Samalam wayah kita ka pasaran rami banar malihat urang baciuman, ujar Garbus.
Di mana Bus? Aku kada malihat wan mahatiakan karna aku kaasikan manukar salawar tanggung kaya arwah julak, ujar Palui.
Kanapa maka dingarani salawar tanggung Lui?
Salawar itu imbah dipakai sampai buruk, ditanggung kada hilang walaupun siang malam dijamur di luar rumah karna bacalumut wan lucak pahumaan. Lalu di mana ikam malihat di pasar samalam ada urang baciuman? ujar Palui handak tahu.
Di kampung timbaku, ujar Tulamak mamadahakan.
Tapi samalam aku ada jua malihat Haji Duraba bakas panghulu nang wayahini bajual kain, ujar Palui.
Kanapa maka kada ikam rawa Lui?
Haji Duraba bajual kain itu kada katatakan, ujar Palui.
Itulah nasib urang sugih, pasti batambah sugih karna dagangannya payu banar, ujar Garbus.
Pak haji itu bajualan kain napa? ujar Tulamak batakun.
Kain nang dijual sidin macam-macam, ada kain salawar, kain baju baik gasan lalakian atawa gasan bibinian, sahut Palui.
Kanapa maka ikam kada manukar kain tapung tatakan haja? ujar Garbus.
Kalo kita manukar bahan maka haraganya cagar talarangi, karna di samping haraga kain ditambah pulang ungkus manjahitnya, ujar Palui.
Itu tamasuk pamarataan razaki balas Tulamak. Tapi aku batakun Lui, kanapa maka pak haji tadi kada katatakan kain jualannya? ujar Tulamak.
Sabujurnya samalam itu kadada nang manukari kain sidin karna sidin ungut-ungut haja manunggui tuku.
Tapi kanapa maka ikam padahakan kada katatakan, padahal sidin ungut-ungut, ujar Garbus.
Bujur haja sidin kada ‘ka tatakan’ karna samalam itu hari Arba, sadangkan di Tatakan hari pasarnya adalah hari Jumahat, ujar Palui manjawab.
Oooooo…… jadi maksud ikam kada katatakan itu artinya pak haji kada tulak bajualan ka Pasar Tatakan Tambarangan. Kukira tadi kada katatakan kainnya karna payu banar urang manukari, ujar Garbus hanyar paham.
Satu kusung aku mahutangi ikam badua, ujar Palui mangalakak tatawa.
