Kisah Palui, Diandak Ka Balakang

Salawas baisian sapida motor, Garbus ada gawian di Dapartemen Parhubungan alias maujek. Salain dapat hahujungan upah maujek, ada jua pangaluaran lainnya gasan manukar bensin wan parawatannya.

Nangkaya samalam karna kararancakan maukur jalan, ban sapida motornya gundul pulang.

“Napa Bus kulihat muha ikam pina pusang, napa nang dipikirakan?” ujar Palui marawa Garbus.

“Ini nah, hanyar sabulan aku manukar ban gasan mangganti ban muka sakalinya pina lisit pulang,” ujar Garbus.

“Memang ban wayahini lakas banar gundul apalagi bila dipakai gasan maujek. Mungkin ikam tatukar ban palsu,” ujar Palui.

“Ujar nang bajualan ban itu asli, kada mungkin inya mangaramputi karna inya langgananku jua,” ujar Garbus mayakinakan.

“Sabujurnya ada akal Bus ai supaya ban itu kada lisit, supaya kada gundul,” ujar Palui.

“Kaya apa cara maakalinya Lui, tulung padahakan supaya kawa jua mahimat duit” ujar Garbus.

“Baiknya ban nang hanyar ikam tukar nang diandak di muka itu supaya diandak di balakang,” ujar Palui.

“Ooooo… kaya itukah maakalinya Lui? Tarima kasih atas usul ikam itu,” ujar Garbus sambil badadas bulik handak mamindah ban muka ka balakang.

Imbah ban muka dipindahnya ka balakang lalu dipakai pulang gasan maujek, kada sampai sabulan kalihatan ban balakang itu mulai lisit pulang, lalu didatanginya Palui.

“Ikam pangaramput banar Lui ai, ujar ikam bila ban muka itu dipindah ka balakang maka kada cagar lisit lagi,” ujar Garbus.

“Kaya apa caranya ikam mamindah dan di mana ikam maandak ban balakang itu,” ujar Palui.

“Ban muka nang hanyar ditukar tadi kupindah ka balakang lalu ban balakang nang lawas kuhurupakan ka muka,” ujar Garbus.

“Ikam tasalah manggawinya, cuba dangarakan bujurbujur papadahku. Ban nang hanyar ditukar tadi jangan dipasang di muka tapi andak di balakang, jadi biar haja ban tadahulu nang dipakai. Ban hanyar nang diandak di balakang itu pasti ampat lima tahun kada cagar gundul lagi,” ujar Palui manjalasakan sambil lihum.

“Ikam pangaramput banar Lui ai, ban itu bila dipakai pasti lusut, pasti gundul kada mungkin tahan sampai ampat lima tahun,” ujar  Garbus mangarasi.

“Ujarku tadi ban nang hanyar ditukar itu diandak di balakang, diandak di balakang ikam, disahan di balukuk, jangan dipasang, makanya pasti cagar tahan kada cuma ampat lima tahun bahkan sampai puluhan tahun,” ujar Palui mangalakak tatawa.

“Ooooo… jadi diandak di balakang awakkukah? Kukira tadi dipasang di balakang. Kalu diandak di balakangku, lalu anak biniku makan napa karna aku tamandak maujek basahanan ban di balakang,” ujar Garbus paham nasihat Palui nang manyasatakan itu.