Kisah Palui – Sudah Bajarat

Rasa pusang wan harung kakak Palui malihat si ading rancak taungut imbah datang matan Batulicin. Pasalnya nang bini kada kawa lagi dibuliki alias rujuk, maski sudah banyak banyu tuan guru. Ada nang ditampungasakan, ada nang diminum supaya sabar wan takdir Ilahi, tatap bakas bini kada hakun lagi dibuliki.

”Ayuha ding ai, bila ada jodoh, ikam rujuk pulang, bila kadada lagi jodoh nyaman bapikir mancari binian lain,” ujar kakak Palui.

‘Barapa tuan guru sudah mambari saran, doa wan banyu, tapi sampai saat ne pina kadada bareaksi,” ujar Palui.

“Sakali lagi Ding ai. Bila kadada reaksinya, ayuha aku cariakan kawanku nang masih bujang guru di sakulahan,” ujar sidin.

Palui kada putus asa. Sakali lagi inya ka rumah tuan guru di daerah pagunungan. Tuan guru nitu hidup jauh matan urang banyak tapi takanal hebat, pangabulan doanya.

“Ikam Palui lah, banyu nang ikam bawa ini, bila ikam handak bailang mandapati mantan bini, tampungasakan banyuku ini lah,” ujar tuan guru nitu sarius banar bapasan.

Sakalinya kadada jua reaksinya. Padahal Palui barapa kali bailang ka rumah bakas bininya.

”Kaya apa ding? Adakah reaksinya nang tuan guru tarakhir ini?” rawa Kakak Palui.

“Baluman lagi,” sahut Palui pina sadih.

“Ayuha kena aku cariakan binian nang masih bujangan langkar,” ujar si kakak mambari samangat.

Sakalinya babinian yang cagar ditujuakan gasan Palui ngarannya Yulianti, kawan di sakulah.

”Yuli, ikam ini masih bujangan iya kalu?” takun Kakak Palui ka Yulianti.

“Inggih kakak ai, tapi ulun… sudah bajarat,” ujar Yuli pina supan ganal.

“Umai Yuli lah, talambat aku manampahi ikam. Padahal adingku si Palui duda wayah ini. Jaka kada pas banar ba ipar wan aku,” ujar Kakak Palui masam muha.

Tadiam Yuliantinya. ”Ulun minta maaf Kakak Palui lah. Mungkin kada jodoh ulun. Kada kawa ai, mudahan nang dudi ada bajodoh…,” ucap Yulianti pina sadih.

Disampaikan ulih Kakak Palui ka Palui. ”Sudah dijarat urang ding ai,” ujar si kakak.

“Siapa nang manjarat? Kasihan inya dijarat, dipasung itukah?” takun Palui pina muar mandangarnya.

“Kada kaya nitu maksudnya ding ai. Sudah bajarat artinya sudah batunangan. Jadi jangan diutak-atik lagi. Calon bini urang nitu. Kita mancari binian lain haja. Insya Allah kena batamuan haja, nang pas, nang cucuk di hati ikam,” ujar si kakak menyabari Palui nang marista.

Imbah bapandiran wan kakaknya, Palui bajalan.

“Apa Lui ikam jadi sadih banar?” rawa Garbus.

“Kada apa-apa Bus ai. Ini masalah kaluarga. Ikam tunggu tanggal mainnya haja, aku handak kawin pulang,” ujar Palui sambil bajalan wan muha masam.