WAYAH musim hujan ini nang paling ditakutanakan adalah kakanakan banyak nang garingan, kana salismaan, batukan, bakakajutan panas awak. Malah wayah ini timbul pulang wabah panyakit DBD atawa panyakit damam bardarah nang manjadi langganan satiap tahun.

“Makanya kita harus umpat manggawi prugram 3M itu,” ujar Garbus mamanderi Tulamak.

“Napa itu prugram 3M Bus, apakah duit nang tiga miliar. Amun duit sabanyak itu aku hakun ai umpat,” ujar Tulamak.

“Ikam ini dasar bangak, kada cardas. Hanyar samalam bubuhan panyuluh kasihatan manjalasakan, ikam sudah kalumpanan,” ujar garbus. “Itu nah takuni katua panitianya nang maundang bubuhan panyuluh itu,” ujar Garbus sambil manunjuk Palui nang hanyar datang.

“Napa Bus maka tunjuk-tunjuk di aku?” ujar Palui.

“Ini nah Tulamak kada mangarti napa itu 3M nang gasan mancagah DBD atawa panyakit damam bardarah itu. Karna ikam tamasuk panitia, pasti ikam paham napa itu 3M,” ujar Garbus.

“Kamana ikam samalam Mak, maka kada tahu wan prugram 3M itu?” ujar palui.

“Aku hadir ai, tapi….,” ujar Tulamak.

“Tapi napa Mak? Tapi tatarusan mangalamun mamikirakan parut nang haur bakuciak minta di-isi?” ujar Garbus manangguh.

“Kabujuran samalam acaranya pas waktu dhuha, aku kada karuan rasa bila katinggalan ba-dhuha,” ujar Tulamak.

“Oooo… maksud ikam waktu dhuha itu jam ikam makan sabalum tangah hari itu kah Mak? ujar Palui paham kabiasaan kawalnya itu nang makan lima-anam kali sahari.

“Lalu napa 3M itu Lui? Aku handak tahu banar, sabab aku dangar di kampung subarang sudah ada kakanakan nang kana panyakit damam bardarah itu? ujar Tulamak mambulikakan kesah.

“Dangarakan Mak lah. 3M itu kapendekan dari Manguras, manutup wan mangubur. Manguras artinya, manguras bak mandi paling kada saminggu sakali, imbah itu dibuati bubuk abate supaya jantik-jantik kada sawat bakambang biak. M nang kadua adalah manutup, artinya manutupi rapat-rapat bak atawa tajau wadah banyu supaya nyamuk kada kawa bahintalu. Dan M nang tarahir yaitu mangubur sampah-sampah nang kawa maulah banyu tatampung nangkaya balik, butul atawa ember bakas nang katujuan nyamuk gasan bahintalu tadi, ehem-ehem….” ujar Palui manarangakan sampai karing rakungan.

“Nah Mak akibat manarangakan panjang libar wan ikam, rakungan Palui jadi karing. Lakasi bawai minuman ka wadah acil Isul!” ujar Garbus manunjuk Palui nang mamusut-musut rakungan.

“Anu… duitku…,” ujar Tulamak pina supan.

“Diam-diam Tulamak ini sudah lawas manggawi 3M itu Bus ai,” ujar Palui. “Yaitu ‘Mambantas’, ‘Mangulir’ wan tarahir adalah ‘Mamicak”. Kaya itu lah gawiannya saban hari. Makanya kada usah hiran amun inya haur takana panyakit DBD jua alias panyakit ‘Da-Ba-Duit’ (Kada Baduit),” ujar Palui mangalakak. (rep/ivd)