Kisah Palui Tabalik Pander
Biar tiga jam haja bamutur matan kampung, tapi Garbus wan Tulamak kada suah manjajak Banjar. Nang sudah parnah ka Banjar cuma si Palui. Itu gin bahari banar, wayah inya halus. Makanya wayah ada kasampatan bubuhannya batiga tulakan ka Banjar. Akhirnya bubuhannya sampai jua di mal.
“Handak jua aku malihat nang ngarannya mal,” ujar Palui.
“Uma ganalnya ai,” ujar Garbus tanganga malihat nang ngarannya mal.
“Bus ingatakan jangan nganga-nganga pina kahiranan. Wan ingatakan di sini kita bapander bahasa Banjar, jangan ba-aku ba-ikam,” ujar Palui babisik. “Supan katahuan hanyar biasa ka Banjar.”
“Napa gantiannya aku lawan ikam tu?” ujar Garbus babisik.
“Ba-unda ba-nyawa kaya urang sini jua ,” ujar Tulamak manggamati.
Ayu ai,…: ujar Garbus. “Kamana bubuhan unda? nyawa handak banar ka mal,” ujar Garbus banyaring.
“Nyawa gen handak jua ka mal, kaya apa unda?” ujar Palui.
“Mun nyawa ni akur haja Lui ai, buhan unda haja lagi banyak lah duit kasana?” ujar Tulamak jua banyaring.
“Ada haja duitnya, kawa haja manukar baju dadua lambar,” ujar Palui manyahuti.
“Hati-hati bubuhan unda lah, orang jajal nah, kalu-kalu ada copet,” ujar Garbus.
“Jangan kawatir nyawa pasti bahati-hati,” ujar Palui banahap bapander.
Rupanya panderan bubuhan Palui wan kakawalannya tadi tadangar ulih bibinian nang dari tadi kabujuran bajalan di belakang bubuhannya.
“Bubuhan pian tu kanapa pina anih bapandernya?” ujar bibinian di balakang tadi batakun.
Marasa ditagur Palui tapaksa bapaling. “Aneh kayapa ding? Kami ini rancak haja manjajak Banjar. Makanya kami manyasuaiakan wan bahasa sini, ba-unda ba-nyawa jua,” jawab Palui.
“Bujur haja ka ai, tapi buhan pian tabalik mamakainya,” ujar bibinian tadi mamadahi.
“Tabalik kaya apa ding?” ujar Tulamak bingung.
“Amun unda tu gasan mangganti aku, amun nyawa gasan mangganti ikam. Buhan pian tadi tahurup alias tabalik, unda gasan ikam, nyawa gasan aku,” ujar bibinian itu lihum.
“Bah.. katahuan am kita hanyar biasa ka Banjar,” ujar Palui kakalahan.
“Gawian handak baagak pang,” ujar Tulamak kasupanan.
“Maka aku tadi nyaring banar bapander, pantas haja urang pina cangangan,” ujar Garbus kasupanan jua.
“Pakai bahasa kita haja ka ai kadapapa jua, disini banyak haja urang hulu sungai. Ulun haja urang hulu sungai jua,” ujar bibinian tadi bapapadahan sambil lihum.
