Kisah Palui dan Lain Kadut

Wayah Palui nyaman-nyamannya guring siang, bininya kukuciak matan dapur mangiyau. Asa mandangar asa kada, sapalih dikira mimpi, makanya Palui taguring pulang. Tapi inya tapaksa babangun karna bininya itu manggawil ka batis.

“UI abahnya, baras di padaringan sudah habis,” ujar bini Palui.

“Kalu kaya itu tutuk banihnya,” ujar Palui gagarunum.

“Kada nyaman-nyamannya manutuk banih nang balum bajamur itu abahnya ai,” sahut nang bini.

“Kalu kaya itu bapikir ai bahutang ka rumah subalah atawa ka warung acil Isul,” ujar Palui.

“Aku supan abahnya ai karna sudah batuyuk hutang di subalah-manyubalah. Bila hari ini kadada baras maka kita kada makanan, balapar haja,” ujar bininya.

“Ayu ja aku bakalah umanya ai, aku tulak manukar baras ka pasar,” ujar Palui sambil maambil bungkusan langsung tulak.

“Bawa kadut nang taganal abahnya ai supaya muat gasan sapuluh letar,” ujar nang bini.

Sampai di pasar di kampung baras, imbah bapapanderan wan panjualnya maka Palui baucap. “Sual haraga akur haja tapi pilihakan baras usang supaya kada lambik nasinya,” ucap Palui.

“Barapa ikam manukar Lui, sabalik kah?” ujar nang bajual.

“Sapuluh letar haja, samumuat kadut galapungku ini haja nah,” ujar Palui sambil manimbai bungkusan kadut galapungnya.

Si panjual langsung manakar sambil mambuka bungkusan kadut, lalu maluruk barasnya ka dalam kadut itu. Tapi inya hiran karna barasnya bahamburan tarus ka lantai.

“Lui… uiii Lui, kadut ikam ini bungkas, mungkin rabit lalu barasnya bahamburan,” ujar si panjual sambil maitihi kadutnya.

“Astaga… ini lain kadut Lui ai, ini salawar handap ikam” ujar si panjual.

“Maaf, maaflah julak, ulun salah jumput karna ulun haratan guring wayah umanya basusuruh tadi. Salawar handap ulun ini kain tapungya bakas kadut galapung itu jua. Ini nah cap-nya wan tulisannya ‘tapung tarigu cap karita’ hanyar dua talu kali pakai haja,” ujar Palui minta maaf karna inya tasalah bawa, manjumput kadut tajumput salawar handap.

“Untung haja masih hanyar Lui ai, tapi walaupun masih hanyar kaciuman jua bau hancingnya,” ujar si panjual lihum sambil mamicik hidungnya.