Kisah Palui dan Wasiat
PUHUN kamarian nitu saparti nang rajin jua, bubuhan Palui sapakawanan takumpulan pulang di pus gardu RT ‘James Bond’, RT 007, RW 045. Nang pamulaan manyurung pandir kamarian itu Tulamak : “Buhan ikam mandangarlah habar tantang ‘ahli waris’ aruwah Pahaji Darjat nang maninggal dunia samalam ?”
“Anak-anaknya wan bini almarhum bacakut babagi warisan-kah, Mak ?” tangguh Garbus.
“Kalu sual warisan buhannya kada jadi masalah, karna katantuannya sudah jalas haja,” jar Tulamak pulang.
“Tarus nang ujar ikam habar tantang ahli waris aruwah Pahaji Darjat nitu, habar nangapa ?” takun Tuhalus panasaran.
“Inya kaya ini, buhannya-ai. Aruwah Pahaji Darjat nitu tarnyata kada cuma maninggali bini wan anak-anaknya warisan, tapi baliau ada jua bawasiat. Nah.., sakalinya justru wasiat almarhum itulah nang jadi masalah bagi ahli warisnya,” Tulamak bapandir pina baapi-api.
“Haw.. Mimangnya napa garang nang diwasiatakan ulih almarhum ?” Tuhalus magin panasaran.
“Hadang dulu.. aku nginum satumat !” Tulamak balalakun sambil manuntum banyu putih nang dibuatnya dibakas butul air mineral, imbah hitu inya mariga.
“Bah.., baya nginum haja maka mariga jua ! Ayu pang dilakasi disambung ‘warta baritanya’, Mak !” Tuhalus mandasak.
“Tarnyata nang diwasiatakan almarhum Pahaji Darjat nitu barupa tarnak hadangan alias karbau sabanyak sambilan blas’ ikung !” (Tulamak nginum pulang). “Nang jadi masalah sakaligus mambingungakan bini almarhum wan anak-anaknya adalah sual pambagiannya harus sasuai awan apa nang tacantum di dalam surat wasiat tarsabut,” lanjut Tulamak.
“Bah.., kalu sual bagi-mambagi, kali-mangali, kurang-mangurang, kan ada kalkulatur ! Napa ngalihnya !? Apalagi nang handak dibagi nitu hanya sambilan blas ikung karbau !” Tuhalus mulai asa diwaluhi ulih Tulamak.
“Hadang dulu, Tuhalus-ai. Parsualannya kada sasadarhana kaya itu. Sakarang cuba ikam tulis cara pambagiannya manurut bunyi wasiat nitu.
Bini almarhum mandapat satangahnya, anak partama dibari saparapatnya, sadangkan anak kadua dibari saparlimanya ! Nah, Tuhalus, cuba pang ikam hitungakan kaya apa cara pambagiannya !?“ Tulamak manantang Tuhalus.
Dahi Tuhalus takurisit. “Ini ngarannya wasiat ‘anih bin ajaib’, Mak-ai ! Mana kawa karbau 19 ikung, dibagi dua, dibagi 4, dibagi 5. Samunyaan saraba ganjil ! Kacuali karbaunya ditatak-tatak dahulu hanyar dibagi,“ Tuhalus asa tapakalah wan Tulamak.
“Aku gin asa bingung jua, Tuhalus-ai. Kadimapa cara mambaginya!” Garbus ba-impati awan kawan. “Tarus kadimapa panyalasaiannya, Mak ?” Takun Palui nang taumpat-umpat bingung jua.
“Jadi.., karna para ahli waris nang diwasiati nitu kabingungan, akhirnya buhannya sapakat minta tulung awan urang nang ahli dalam parhitungan waris atawa tahsilul furud,” jar Tulamak manarusakan habarnya.
“ Uu..Nitu sutil haja.., jar sidin nang ahli tahsilul furud tarsabut. Partama buhan ikam sacara iincaan aku injami saikung karbau, sahingga jumlah karbau ikam sakarang manjadi dua puluh ikung (19+1=20). Nah.., karbau atau hadangan nang 20 ikung itu, mari kita bagi sasuai bunyi wasiat almarhum, yaitu gasan uma ikam (bini almarhum) : ½ x 20 = 10 ikung. Gasan anak partama : ¼ x 20 = 5 ikung. Sadangkan gasan anak kadua 1/5 x 20 = 4 ikung “.
Tarnyata jumlah karbau nang ditarima ulih masing-masing ahli waris’ ( 10+5+4 = 19 ikung ), pas banar awan jumlah karbau nang diwasiatakan ulih almarhum, yakni 19 ikung.
“Nah.., karna sudah kalup dan parsualannya sudah ruus, maka karbau nang iincaan kuinjamakan tadi sakarang aku ambil kambali,“ ujar ustadz ahli tahsilul Furud nitu sambil tatawa “, Tulamak maakhiri habar baritanya.
Palui, Garbus, Tuhirang dan Tuhalus batitiringan, imbah hitu papada manyalami kaalah Tulamak.
“Hari ini kita kawa diwaluhi ulih Tulamak,” ujar buhannya tatawaan.
