HAJI Leman nang barumah di simpang tiga hanyar manukar mutur taksi. Palui handak malamar manjadi supirnya. Karna kadada ribuwis, inya handak baulah di kapulisian. Wayah tatamu Tulamak, Palui mambawai kawalnya itu ka rumah Garbus karna Garbus banyak baisi patuhan pulisi.

Imbah sampai di rumah Garbus, lalu Palui minta tulung ganii ka kantur pulantas maurus SIM.

“Mulai matan bahari aku sanang hati manulung ikam Lui ai, ikam aja nang bahanu ibarat kacang kada ingat wan kulitnya,” ujar Garbus manyindir. Lalu bubuhannya tulak ka kantur pulantas.

“Ujian ribuwis ini dimulai wan ujian tatulis,” ujar patugas panguji.

“Aku siap, karna aku sudah biasa jua jadi kernet,” ujar Palui wayah inya manggawi ujian tatulis. Lalu imbah tuntung manggawi wan langsung dipariksa, maka patugas panguji itu mamuji Palui karna hasilnya baik.

“Jawaban ikam banyak nang bujur Lui ai, padahal kulihat ikam manggawinya pina santai haja,” ujar patugas panguji.

“Tarus tarang haja aku sudah bapangalaman umpat ujian. Aku biasa umpat ujian panarimaan perawat, lalu ujian masuk tamtama, ujian masuk pulisi, macam-macamlah,” ujar Palui. “Luluslah Lui?” ujar patugas panguji.

“Alhamdulillah kada lulus karna awakku randah wan batisku bengkok kaya huruf O,” ujar Palui mangaku tarus tarang. “Kalu jadi supir, batis bengkok ini pas banar karna kawa langsung manjajak gas, kopling wan rem sakaligus,” ujar Palui mambumbui panderannya.

“Ujian nang kadua Lui ai adalah ujian praktik jalan,” ujar patugas panguji.

“Kalu sual ujian praktik jalan kukira kada parlu lagi pak pulisi ai,” sahut Palui.

“Hau … kanapa maka kada parlu Lui?” ujar patugas panguji.

“Praktik jalan itu sudah tuhuk kugawi mulai matan dahulu sampai wayahini. Malah kada siang haja, malam gin kugawi jua. Kamana-mama aku bajalan batis tarus, lantaran kadada baisian sapida. Jadi praktik jalan itu sudah jadi gawianku,” ujar Palui.

“Ikam salah paham Lui ai, praktik jalan itu artinya ujian manyupir. Kaya apa ikam mahidupi masin, mamasukakan gigi, mamindah perseneling, biluk kiri biluk kanan atawa baundur,” ujar patugas panguji itu.

“Ooo … kaya itukah, mudahan ai aku lulus,” ujar Palui sambil manggitir mahidupi masinnya. (rep/tam)