Kisah Palui Tatarus Taguring

Salawas bulan puasa Palui wan kakawannya tamasuk rajin jua ka langgar. Inya hakun umpat pangajian saban malam. Gawian bagadang diulah bubuhannya gasan baamal ibadah. “Umpat tadarusan kalu Lui malam ini? “ujar Tulamak manakuni Palui limbah tuntung tarawih.

“Insya Allah Mak ai, asal jangan mangantuk haja,” ujar Palui lalu masukan ka langgar.

Di dalam langgar sudah mulai urang bagiliran mambaca, kabiasaan bila pina banyak urangnya, sadikit jua nang dibaca. Tapi bila sadikit, maka bisa bagilir sampai dua talu kali mambaca. Bubuhannya mahitung supaya malam tarakhir pas jua lawan jus nang dibaca. Malam ini tabarungan kana mambaca dua kali giliran. Limbah mambaca sakali, Palui pina manghilang, pina kada talihat lagi batang hidungnya.

Bingung bubuhan Garbus wan Tulamak mancari kasana kamari, sampai tadarusan tuntung tatap kada kalihatan muha Palui.

“Kalu inya bulik ka rumah badahulu, tadi inya bapadah mangantuk kalu?” ujar Tulamak.

Imbah bapapanderan satumat, lalu ai bubuhannya bulikan jua.

Subuhnya pas tuntung basahur, wayah handak sambahyangan tadangar bubuhan bibinian pina galu di langgar. Sakalinya di sap babinian ada nang kukuciak talihat hantu.

“Napa bini Palui, kanapa buhan ikam pina katakutan?” ujar Tulamak wan bini Palui nang kabulujuran ada disitu.

“Di dalam ada hantu Mak ai!” ujar bini Palui bakisah.

“Mana ada hantu bulan puasa ni, ayu kita lihati Bus,” ujar Tulamak mambawai Garbus malihati. Balumam talihati sakalinya urang nang dipadahakan hantu tadi kaluar badahulu.

“Kanapa pina ribut banar?” ujar Palui sambil malapas ka kalubutannya.

“ha.. ha… ini lain hantu bini Palui ai, tapi laki ikam nang taguring mamakai mukana bibinian,” ujar Garbus lucut tatawa limbah tahu Palui nang guring di sap bibinian.

“Urang takutan malihat ikam taguring mamakai mukana Lui ai.”

“Hi-ih, aku kanyamukan wan kadinginan tapaksa bakalubut mukana,” ujar Palui pina supan.

“Cucuk haja pian kada basahur di rumah, ulun kira basahur di warung, sakalinya taguring di langgar,” ujar nang bini manumpalak.

“Aku mangantuk banar ding ai wayah tadarusan, lalu aku barabah di sap bibinian. Sakalinya tatarus taguring sampai subuh, untung limbah tarawih aku baniat puasa,” ujar Palui mangisahakan sambil taungut kada basahur.

“Kasian Palui, tadarusan jadi tatarusan,” ujar Garbus wan Tulamak manawaakan.