PASAR tungging wayah ini kada kaya dahulu lagi karna salain pasarnya nang bapindah wadah, bubuhan pasar balauran banyak jua nang bapindah bajualan ka situ. Tapi amun itih masih ada saikung badua nang masih bajual baju wan salawar bakas matan luar nagri itu.
“Lui, pina banyak batukar baju salawarlah?” ujar Garbus marawa Palui wayah mambawa puntalan.
“Kanapa maka ikam tahu bahwa nang kubawa ini baju salawar,” sahut Palui.
“Pasti haja aku tahu karna bungkusannya bulat pasti isinya kain, kalu ikam mambawa bungkusan balik kurma pasti sagi ampat,” ujar Garbus kada hakun kalah.
“Aku mamburung, rami banar urang bajualan baju salawar bakas nang sudah jadi,” ujar Palui.
“Oooooo…….. itu baju salawar luar nageri, aku ada jua manukar dua talu pasang. Biar pakaian bakas tapi samunyaan masih hanyar-hanyar babau pabrik,” ujar Tulamak.
“Cucuk hajalah ukurannya wan ikam Mak,” ujar Garbus.
“Samunyaan cucuk haja, pas banar wan awakku karna awakku ganal sama wan awak urang luar nageri,” sahut Tulamak baagak.
“Tapi aku maraguakan wan Palui karna awaknya kurus karimping kaya pentol korek,” ujar Tulamak pulang mahuhulut Palui.
“Aku paham haja Mak ai bahwa baju salawar matan luar nageri ini ganal-ganal, hitunganku manang manukar, manang haraga karna kainnya banyak, kaina baju salawar itu diupahakan mahalusi, lalu sisa guntingannya kawa diulah kain lap,” ujar Palui.
“Tapi ikam harus hati-hati jua Lui ai, ujar urang bahwa baju bakas urang luar nageri itu bisa babahaya karna di sana rami panyakit AIDS,” ujar Tulamak.
“Gampang haja, ditapas, dirandam banyu panas. dikalantang, dijamur pasti barasih,” ujar Palui.
“Barapa haraganya salambar Lui?” ujar Garbus.
“Haraganya salambar Rp 25.000,” ujar Palui.
“Barapa ungkus maupahakan mahalusi baju salawarnya Lui?” ujar Garbus.
“Ujar tukang jahit karna dirumbak samunyaan maka ungkusnya Rp 25.000 salambarnya,” ujar Palui.
“Jadi barapa jumlah haraga salawar wan ungkus mahalusinya Lui?” ujar Tulamak maanyaki.
“Hiih-lah, samunyaan jadi lima puluh ribu sama wan baulah salawar hanyar,” ujar Palui kakalahan karna salah hitung.
“Ikam kada kalah Lui ai karna masih ada tulisan made in-nya ulahan luar nageri,” ujar Garbus mahimungi. (rep/tam)
