Kisah Palui Talipat Batis
Imbah takana PHK, Palui sampat bagawi macam-macam. Tapi, samunyaan kada baumur panjang. Palui ahirnya bamufakat wan bininya bulikan ka kampung, mancari gawian nang cucuk.
“Ulun manurut haja napa ujar sampiyan, paribahasanya tabalik tatilantang, nyamankah, sakitkah asal kita badua ulun sanggupi haja,” ujar bini Palui.
“Aku katuju banar wan jawaban ikam itu ding ai, jadi ikam bujur-bujur tamasuk bibinian nang hakun manyandang sakit sanang wan laki,” ujar Palui.
“Ulun indah dipadahakan mata duitan kaya bibinian lainnya, wayah sanang marayu mamuji wan laki tapi imbah laki sakit kadada gawian lagi lalu pina mangulicar minta sarak lalu mancari lalakian lain,” sahut bini Palui.
“Kalu kaya itu bungkusi barang-barang, kaina kita bapadah wan kakawalan di sini karna handak bulikan ka banua,” ujar Palui.
Kada lawas imbah Palui wan bininya basisimpun barang dan handak tulak ka taksian, maka datangan kakawalannya handak maucapakan salamat jalan wan Palui.
“Ampun maaflah kakawalan, salawas kita takumpul di sini mungkin ada kasalahan wan kahilafan kami laki bini,” ujar Palui pina sadih.
“Kami kaya itu jua minta maaf wan ikam laki bini karna maklum bakawan pasti haja ada nang kada nyaman dalam hati,” ujar Tulamak.
“Supaya jangan bakalangan di hati ikam, maka kumaafakan haja samua kasalahan wan kahilafan ikam tamasuk hutang ikam nang balum dibayar kuihlasakan dan kubariakan haja,” ujar Tuhirang.
“Wah, tabalik Rang ai, mustinya akulah nang minta maaf karna balum kawa mambayar hutang, tapi syukur kalu sudah dibariakan. Batambah-tambah lagi tarimakasihku kalu dibari ungkus mutur taksinya,” sahut Palui lihum.
“Kalu sual ungkus taksi… beres kami jamin,” ujar Tuhirang wan Tulamak sambil manjulung duit sangu.
“Tapi awas… hati-hatilah kalu talipat batis,” ujar Tuhirang.
“Kanapa maka ikam baucap kasar kaya itu Rang, itu sama wan ma-ancam kami imbah mambari duit. Artinya ikam kada ihlas,” ujar Palui marasa kada nyaman.
“Bujur ujar Tuhirang itu, hati-hati kalu talipat batis,” sahut Tulamak mambujurakan ucapan Tuhirang.
“Napa maksud bubuhan sampiyan itu mamadahakan hati-hati kalu talipat batis,” ujar bini Palui handak tahu karna marasa kada nyaman diancam.
“Maksud kami hati-hati talipat batis duduk di mutur taksi karna panumpangnya hibak lalu duduk bakakajalan,” ujar Tuhirang tatawa.
“Sampai handak bapisah masih digawinya haja aku,” ujar Palui mangalakak tatawa sambil basalaman.
