Kisah Si Palui Manyasal Badahulu

NGALIH wayahni mancari urang nang manyasal badahulu, hampir-hampir kadada kalu nang kaya nitu. Kabanyakan manusia manyasal kamudian, satalah kajadian hanyar manyasal. Cuntuh nyata, urang mangunsumsi ubat-ubatan tarlarang, imbah ditangkap pulisi hanyar manyasal, pasti kaya nitu, nasi sudah jadi bubur!

”Cuma sabuting pang manurutku haja Bus lah, ada urang manyasal badahulu?” ujar Palui ka Garbus.
‘Siapa Lui nang kaya nitu?” takun Garbus bingung.

“Kaya ni nah, pamilihan kapala daerah atau jar urang pilkada tahun 2018, di Indonesia ada puluhan daerah nang calun tunggal. Urang kada wani mancalun sabagai kapala daerah wan wakil kapala daerah, tangguhanku haja pang, karana urang manyasal badahulu?” Palui manangguh.

“Inya napa Lui?” takun Garbus.

“Iya macam-macamlah, alasan banyak habis duit kalau urang wani bacalun kapala daerah nitu. Bila kada tapilih iya am sudah, duit habis tapilih kada, hanyar manyasal , tangguhanku haja pang,” sambat Palui.

“Ayuha kita bapander nang lain haja gin, bapander masalah pilkada, apa banyak intelnya,” sahut Tulamak nang dari tadi badiam.

Kada lawas ada ustadz muda nang rajin ceramah agama di Masjid Takwa basinggah mandapati buhannya. ”Assalamulaikum Palui sapakawalan?” salam ustadz.

“Walaikum salam ustadz muda,” jawab Palui.

“Napa jar buhan pian tadi pina rami banar bapanderan manyasal badahulu ada apa Lui?” takun ustadz.
“Uh mandangarkah pian?” sahut Palui.

“Sidin berarti mandangar Lui ai, panderan kita tadi,” jawab Garbus.

“Kaya ni ustadzlah, manyasal badahulu nitu hampir kadada nang dilakukan manusia,” ujar Palui mambari parnyataan.

“Nah ni nang parlu ulun jalasakan ka buhan pian berataan,” ustadz mulai bapander.

“Kita ni hidup di dunia kada lawas, ulih karana nitu parlu manyasal badahulu sabalum samuanya talambat,” lanjut ustadz.

“Kaya apa caranya kita manyasal badahulu nitu ustadz?” takun Tulamak.

“Caranya manyasal badahulu ya banyaki baibadat, lakasi bataubat minta ampun kapada Allah Taala , jangan tinggalakan kewajiban salat lima waktu, baik-baik kalakuan wan urang tuha (mama abah), wan urang nang tuha lainya, tetangga, kaluarga, wan urang lainnya, jangan parnah manyakitkan baik parkataan maupun parbuatan,” ustadz bapapadah banar.

“Inggih ustadz ai, syukur banar kami ada nang mamadahi, apalagi kami kuitan kadadaan lagi sudah, maninggal dunia, siapa lagi nang mamadahi mun kada urang alim,” Palui asa himung diberi pencerahan uli ustadz.

“Ulun ustadz lah, tarus tarang haja , takutan banar manyakiti urang lain baik parkataan maupun parbuatan, takutan tatinggalakan salat lima waktu, takutan barbuat dosa,” sambat Garbus.

“Bujur Garbus ai, nitu tanda urang manyasal badahulu jua, kalau kalakuan atau sikap kaya nitu,” sahut Ustad.

“Tarimakasih ustad lah, mudahan kami sapakawalan tamasuk urang nang manyasal badahulu, jadi takutan banar kalau-kalau malakukan parbuatan dosa,” Palui baharap, lihum ustadznya.