Kisah Si Palui Kada Mangalilu?

BARAKAT manyakulahakan anak ka pondok pesantren (ponpes) jadi ada hikmahnya bagi urang tuha nang bahari kada sampat balajar ilmu agama. Kaya nitu jua Palui marasa himung dipadahi anaknya nang bila hari Jumahat ada di rumah, karana Sabtu sampai malam Jumahat masih balajar di ponpes.

”Apa te Nak, kulihan ilmu wan ustadz ikam di ponpes?” takun Palui ka anaknya.

“Banyak banar Bah ai, saparti salat lima waktu jangan ditinggalakan lagi, usahakan banar salat bajamaah, jangan sampai langgar atau masjid puang, nang maisinya urang-urang tuha haja, samantara buhan kakanakan, remaja sintupan di rumah haja salatnya, kaya apa nih?” anak Palui kritis.

“Ada lagikah papadah ustadz nang lain?” Palui betakun pulang.

“Ada Bah ai nah, parlu bagi pian wan urang tuha lainnya atau bagi kakanakan kaya ulunkah kada salahnya tahu, maka diamalakan jua,” sahut nang anak.

“Apa Mat, papadah ustadz te?” nang mama mamaraki anaknya handak jua tahu.

“Ujar ustadz jangan guring imbah salat Asar kena mangalilu, alias lali, balum tuha kena sudah pangalumpanan atau ujar urang rancak kada ingat, misalnya maandak kunci sapida mutur masih kada becabut pada sapida muturnya, akhirnya hilang jua ai kalu sapida mutur pian. Tapi untung ha ada nang mamadahi sapida mutur pian parkir di rumah A,” ujar nang anak mamadahi abah wan mamanya.

“Ubui lah, Nah, aku dasar kada paingatan lagi wayahni karana matan lagi bujang suka guring imbah salat Asar,” Palui asa marista mangakui kabiasaan buruknya nitu.

“Matan hari ini Bah ai, pian dibawa baaktivitas kamanakah bajalanan bila habis salat Asar nitu,” sahut nang anak manyaranakan.

Karana disuruh nang anak Palui hakun tiap kamarian wayahni bajalanan entah ka pasar, ka taman Palidangan atau ka pangkalan ujek wadah kakawalannya.