If you want to share and earn points please login first

Si Palui Asik Mawarnet

Nang ngaran wayahni, parkambangan zaman sungguh luar biasa wan kamajuan sampai ka buncu-buncu kampung sudah. Waktu baisuk saat tadarusan Alquran kadada murid nang bangaran Utuh Usin di kalas.

”Mana Utuh Usian kada talihat mangaji?’ ujar Palui ka buhan murid kalas VII c salaku wali kalasnya.

“Utuh garing Pak Palui ai?” sahut Aluh Rinti.

“Garing samalam gagah banar basapida mutur ulun lihat saurang di pasar,” sambat Palui asa curiga.

“Pian jar siapa jadi tahu inya garing?” takun Palui.

Malam tadi Utuh Usiannya ma sms ka hapi ulun Pak Palui ai,” jawab Aluh Rinti kawannya sakalas.

“Uh kaya nitukah Luh,” sahut Palui takulibi.

Kada lawas ada Garbus, paman sakulahan, datang manamui Palui. ”Lui anak murid ikam kalas VII c si Utuh Usin tadi aku handak ka sakulahan kulihat inya babaju sakulah jua tapi ampah ka pasar,” Garbus mambari info ka Palui.

“Iyakah Bus?” Palui takijat.

“Kena satangah jam lagi aku bajalan ampah ka pasar kalu ah inya bakaliaran di pasar mambari supan,” Garbus betawar ka Palui handak mancariakan.

“Ayuha Bus ai, tuntungakan gawian ikam dahulu babarasih hanyar mancari murid nang kada masuk hari ini,” jawab Palui.

Sakalinya imbah di absen ulih masing-masing wali kalas ada babarapa urang nang kada turun alasan garing. Ada Asnan, Asmin, Utuh Usian, Utuh Putin kadada turun ka sakulahan alasan garing.

“Nah napa Lui ba ampat nang kada turun banyak banar ya? Maka ada nang kalas IX , parak banar sudah ujian,” sambat Garbus prihatin.

“Kita lapurakan haja ka ibu BP (bimbingan panyuluhan),” sahut Palui.

Diambil kasimpulan Palui wan Garbus disuruh ibu BP maambili anak murid nang ba ampat nitu.” Bajalan ka pasar buhan pian kalu buhan murid kita nitu ada di pasar,” suruh ibu BP.

“Ayuha Bu ai, kami segera tulakan ka pasar,” ucap Plui pina asa pusang inya.

Dasar buhannya sampai ka pasar bahkan sampai ka buncu-buncu pasar mancarii kadada betamuan jua, lalu tadapat Tulamak nang jaga parkir di pasar nitu.”Uh Lui, Garbus mancari muridkah?” takun Tulamak.

“Iya bujur banar Mak ai, kalu buhannya bakaliaran di pasar apa kita tangkap haja,” Palui rasa garigitan banar.

Karana bajalan ka sana ka mari akhirnya tatamu di warnet parak jambatan subalah pasar. ”Nah napa Lui buhannya nang ba ampat babaju sakulahan asik mawarnet dasar liwar buhan ikam ya!” sungut Palui.

“Ayu lakasi bubar, lakas ka sakulahan!” saru Garbus.

Mahancap buhan murid nang ba ampat nitu ka sakulahan “Han jarku kakanakan wayahni, bisa bakaramput bapadah garing, sakalinya asik mawarnet, video napakah dijanakinya ya?” Palui gagarunum sapanjang jalan ka buhannya nitu.

“Makanya parlu parhatian kita sabarataan, urang tuha, guru, pamarintah, masyarakat harus barsinergi ujar urang wayhni dalam mandidik kakanakan milenial Lui lah?” gerutu ibu BP nang langkar nitu ka Palui. Ba istighfar Palui malihat kalakuan kakanakannya di sakulahan nitu.

If you want to share and earn points please login first