Kisah Palui Sakira Jara
Palui hiran banar kanapa maka Garbus hari itu pina sigar kada nangkaya biasanya. Biasanya inya hari-hari pina liyut tarus, pangaruh parut lapar wan mata mangantuk karna puasa.
Aku kalihatan sigar ini karna baudu imbah sambahyang zuhur, sahut Garbus.
Garbus pangaramput, ikam badosa ganal karna dua kali bakaramput, ujar Palui.
Partama ikam bakaramput karna kada puasa, kadua ikam badusta karna bapadah imbah sambahyang zuhur padahal hari hanyar pukul satangah dua belas, ujar Palui. Tarus tarang haja Lui, aku hari ini kada puasa karna awakku uyuh banar, malam tadi kada tabangun, ujar Garbus.
Awak ikam uyuh karna bamamalaman bagadang umpat bagarakan lalu taguring sampai baisukan, ujar Palui.
Ayu ja, aku mangaku kalah Lui ai. Aku bajanji isuk puasa lagi kaya biasa, ujar Garbus.
Aku minta tulung Lui, kawalah minta ruku sabilah barang, liurku pahit banar karna balum makan wan balum nginum kupi.
Bila aku mambari rukuk bararti aku nang badosa karna mambulihakan ikam kada puasa, ujar Palui.
Tadi aku sudah bajanji bahwa isuk aku puasa tarus sampai habis bulan, ujar Garbus marayu.
Sakali ini ikam kukabulkan, tapi ambil rukuknya di rumah, ujar Palui manyuruh.
Tulung ambilakan Lui, aku ja aku mahadang diluar haja karna supan masuk katahuan bini ikam, ujar Garbus.
Nah………. ini rukuknya, tapi sabilah haja. Nang lainnya kaina kubari imbah buka puasa, ujar Palui sambil manjulung ruku sabilah. Mana kurek apinya Lui? ujar Garbus.
Ikam ini Bus ai talalu-lalu banar sudah dibari alar handak dada, kaina dibari hati lalu handak manjajak ka kapala, sahut Palui.
Tarima kasih Lui ujar Garbus sambil bukah ka higa gardu handak baruku. Garbus mulai maisap ruku dan langsung manitis kurek api.
Hanyar talu kali isap sakalinya……….. dor……. dor…… dor…….. Ha ha ha…, Palui tatawa langsung inya mandatangi si Garbus di higa gardu.
Aku badosa, aku badosa, aku patut dapat hukuman langsung, sahut Garbus sambil baungkai matan gardu wan muhanya hirang kana pacahan latupan.
Kada apa-apa Bus ai, kada mambahayai karna latupannya halus haja, ujar Palui.
Mudahan ikam insyaf. Aku paham Lui ai bahwa rukuk itu ikam buati latupan maksudnya supaya aku jara kada puasa, ujar Garbus sambil mambarasihi muhanya nang latat kana latupan.
