Palui tamasuk paling pangoler wan rancak bangun malandau. Sudah jua inya dipadahi ulih uma abahnya supaya maubah kalakuannya itu karna bila handak babini harus rajin bacari razaki, jangan pangoler wan jangan bangun malandau. Sampai akhirnya Palui kawin wan si Zaleha gadis pujaan hatinya, tapi kalakuannya tatap kada baubah.
“Karna ulun balum bagawi tapaksa ulun umpat sampiyan haja,” ujar Palui.
“Tapi ada syaratnya ikam harus bausaha wan jangan pangoler,” ujar mintuhanya.
“Inggih, insya Allah ulun kada pangoler lagi,” ujar Palui.
“Sual hidup ikam jangan disakitakan hati, makan nginum wan tapih baju ikam kaina kami nang mambantunya,” ujar mintuha Palui.
Imbah babarapa bulan Palui kawin, pinanya kadada parubahan jua kalakuannya nang pangoler wan katuju bangun malandau, lalu mintuhanya mulai sarik.
“Uii Zaleha, kaya apa laki ikam itu pina pangoler banar, guringnya imbah isya tapi bangunnya pukul sapuluh,” ujar mintuha Palui mamanderi anaknya.
“Sudah jua ulun padahi supaya jangan malandau tapi sudah tabiatnya,” sahut bini Palui.
“Baisukan ini bila si Palui laki ikam itu malandau pulang, maka cagar kusimbur wan banyu,” ujar abahnya sambil mambawa gayung baisi banyu.
“Kaka Palui,” ujar bininya, lakasi bangun hari sudah siang. Karna Palui kada hakun bangun jua wan masih tabungkun di kalambu maka mintuha Palui makin sarik lalu langsung manyimburakan banyu di gayungnya.
“Ding…….. ding hujan labat banar sampai miris rumah wan kalambu kita katampiasan banyu,” ujar Palui mangiyau bininya.
“Hari kada hujan,” sahut bininya.
“Ini nah tapihku basah katitikan banyu,” ujar Palui.
“Ayu lakasi bangun, abah mahadangi sampiyan handak bapander,” ujar bininya matan luar kamar.
“Ayu ja kaina siang kubaiki hatap nang miris itu supaya rumah kita kada katitikan banyu lagi,” ujar Palui sambil bapuat matan ranjang. Imbah mambuka mata Palui takajut banar karna mintuhanya sudah mahadang di muhara lawang sambil tangannya baingkutan cangkul wan sakrup.
“Ayu lakasi bagawian dangani aku,” ujar mintuhanya.
“Gasan mambaiki hatap miris kada wan cangkul,” ujar Palui manjawab.
“Kita kada mambaiki hatap tapi manabuk sumur supaya kada cagar kahabisan banyu manyimbur ikam,” ujar mintuhanya manyindir.
“Inggih ulun paham Bah ai karna ulun palandauan bangun,” sahut Palui kasisipuan disindir mintuhnya.
