Kisah Palui Menjamur

Garbus wan mintuhanya nang di Gambut basulisih paham tantang jamur-menjamur, sahingga Garbus disariki mintuha. Pasalnya, nang mintuha manyuruh Garbus menjamur banih gasan maulah baras, cagar dimakan. Tapi Garbus mambantah, wayah ini musim hujan, kada mungkin manjamur.

Nang mintuha tatap karas lalu baucap: Tuh, itu dangarkan di radio, koran wan tv, sakarang menjamur padagang kaki lima, baliho, umbul-umbul, sapanduk dll. Baarti hari kada musim hujan, ujar mintuhanya. Lantaran kada handak bahual tarus wan mintuha, Garbus lalu batakun ka Katua RT, Palui tantang masalah jamur-manjamur.

Palui lalu manjalasakan. Ada pun jamur itu Bus ai dalam bahasa Indonesia, ialah sejenis cendawan nang tumbuh subur di musim hujan. Ia tumbuh di tanah, di batang-batang kayu jabuk, banyak digulai dimakan ulih kita. Tapi ada pula jamur itu tumbuh di awak kita, yaitu panyakit gatalan, kurap, kudis, alergi dll, ujar Palui.

Umailah, sakalinya jamur itu macam-macam, ujar Garbus bakirik.

Menjamur itu adalah kata menunjukkan sesuatu yang tiba-tiba banyak wan melimpah. Misalnya menjamur bubuhan gelandangan pengemis (gepeng) di hari raya, menjamur penjual petasan marcon di bulan puasa, ujar Palui manjalaskan arti menjamur.

Astagaaa…., ujar Garbus bagaru kapala. Kukira menjamur itu ialah manjamur di panas matahari. Artinya mintuhaku tasalah ma-artikan antara bahasa Indonesia wan bahasa daerah Banjar, ujar Garbus menggarunum.

Kadua-duanya salah, ujar Palui maniwas sama-sama kada mangarti. Kalu manjamur banih di musim hujan ngini, pasti ai disangka urang kada waras.”

Ha ha ha…, Palui wan Garbus mengalakak tatawan.

Ini tugas ikam Bus-ai, mambari panarangan lawan mintuha ikam, apa artinya jamur-menjamur di musim hujan ini, ujar Palui Kalu parlu bawai bini ikam, umpat bapandir supaya ikam kada disariki mintuha lagi.

Insya Allah, Lui-ai tarima kasih, ujar Garbus takarinyum.