Kisah Palui Mangaramputi Wan Sandal

Sudah baminggu-minggu pulang Palui kada kalihatan batang hidungnya. Biasanya ada haja inya di gardu atawa di warung acil Isul.

“Palui itu banyak tingkah, bila kita parlu inya ngalih dicari tapi bila kita kada parlu ada haja urangnya,” ujar Tulamak.

“Sabujurnya aku kada parlu jua Mak ai, tapi nang ngaran kawan tatap haja handak batamuan,” ujar Garbus.

“Aku batamuan atawa kada batamuan, kada napa-napa jua karna inya rancak mangalihi kita,” ujar Tulamak.

“Tapi ikam harus ingat Mak ai, bila Palui ada biasanya razaki kita tanyaman karna kawa jua minta rukunya,” ujar Garbus.

“Hi’ih-lah, bujur jua ujar ikam itu Bus ai,” sahut Tulamak sambil manunjuk si Tuhabuk nang datang mamaraki bubuhannya.

“Apa habar Buk pina panting banar?” ujar Garbus managur.”Umpat batakunlah Bus, apakah dalam babarapa malam ini bubuhan ikam ada bailang ka rumah Ruhana?” ujar Tuhabuk.

“Bailang ka rumah Ruhana malam-malam? Bailang siang hari haja kada biasa apalagi malam-malam, kami takutan kada wani kalu ditangkap RT,” ujar Garbus.

“Tapi nyatanya saban malam imbah isya Palui bapadah bailang ka rumah Ruhana basama-sama wan bubuhan ikam. Bubuhan RT handak managur tapi kada sampai hati karna mahurmati bubuhan ikam, apalagi bailangnya kada saurangan. Kalu ikam kada parcaya ayu wayah ini jua kita ka rumah Ruhana, di palatarnya basusun babarapa pasang sandal, artinya nang bailang itu kada saurangan,” ujar Tuhabuk.

“Napa buktinya maka aku, Garbus wan Palui dipadahakan bailang, tapi nyatanya dalam samingguan ini aku kada bisa batamuan Palui lagi,” ujar Tulamak.

Imbah sampai di rumah Ruhana, sudah mahadang jua bubuhan RT handak tahu siapa nang saban malam bailang itu. Tulamak mangatuk rumah Ruhana karna didangarnya ada suara garunuman bapander.”Ayu masuk, tunjul ja lawangnya,” ujar Ruhana. Sakalinya di dalam rumah itu hanya Palui baduduan haja wan Ruhana.

“Nah, ikam tatangkap basah Lui ai, kanapa maka saban malam wani bailang manyaurangan haja? Rupanya kami warga RT ikam karamputi, saban malam di palatar ini basusun talu ampat pasang sandal makanya kami kira nang bailang ikam wan Garbus dan Tulamak. Makanya kami kada curiga,” ujar katua RT bamamai.

“Nahhh… ini kalumku Lui ai,” ujar Garbus.

“Hi’ih, ini sipatu sandalku nang di-injam Palui,” ujar Tulamak maitihi.

“Pantas haja babarapa hari tadi aku kahilangan kalum, rupaya ikam bawa ka sini,” ujar Garbus.

“Palui, Palui, ikam tatangkap basah Lui ai, ma-akal singhaja manyusun sandal babarapa pasang di palatar Ruhana supaya dikira bailang banyak kawannya, sakalinya ba-in-hoy,” ujar katua RT sarik sambil mambawa Palui ka rumah Pambakal. emhati.