Kisah Palui Mancatuki Dauh

Bubuhan Palui, Garbus wan Tulamak sudah lawas banar bakawan, sudah matan halus hidup sakampung sampai baanak wan babini.

Jadi napa haja kalakuan kakawalan masing-masingnya sudah maklum haja.

“Ada banyak syarat supaya bakawan itu awet,” ujar Garbus.

“Hau, kanapa maka ikam baucap kaya itu Bus? Apakah bakawan kita ini kada baik?” ujar Tulamak.

“Maksudku supaya bakawan itu awet wan lawas maka harus ada saling pangartian, kada curiga, jujur, ihlas, hakun kurang labih dan hakun bakalah,” ujar Garbus.

“Aku akur banar Bus ai, tapi kawal kita si Palui itu nang pina paharatnya, cakah, rakus, pamalar,” ujar Tulamak.

“Palui itu sabujurnya urangnya baik, jujur dan jarang sarik,” ujar Tulamak.

“Tapi… tapi aku nang paling kada katuju adalah inya itu pandandam, pandandam banar,” ujar Tulamak.

“Sifat pandandam Palui itu adalah sifat bawaan matan lagi dalam parut. Mungkin wayah umanya mangidam dahulu ada nang kada tulus,” ujar Garbus malamahi.

“Mana Paluinya kadada kalihatan padahal kita sudah bajanji tulak baimbai ka masigit,” ujar Tulamak mambawai tulakan ka masigit handak ba-isya salajur tarawih.

“Mak, uiii… Mak, itu Paluinya sudah ada parak dauh, mahadang waktu isya. Mungkin hari ini inya mandapat giliran mancatuk dauh,” ujar Garbus mambawai Tulamak mamaraki Palui. Balum sampai ka wadah Palui, babunyi tanda waktu isya dan Palui pun basiap-siap mulai dauh.

“Tok, tok tok tok tok, tok, dong, dong, dong… tok, tok, tok…dong… dong,” bunyi mancatuk dauh.

“Bus, uiiiii… Bus, napa Palui maka pina bahimat banar mancatuk dauh itu wayah kita mamaraki inya,” ujar Tulamak. “Wan anihnya di kulit dauh ada gambar parsis kaya muhaku,” ujar Talamak manggawil Garbus.

Makin malihat Garbus baparak, Palui makin gancang mancatuk dauh nang ada gambar muha Tulamak.

“Lui, uuiii… Lui, sabar Lui, cukup sudah,” ujar Tulamak.

“Balum habis, sakali lagi putaran iramanya,” sahut Palui sambil bahimat mamukul kulit dauh bagambar Tulamak.

“Napa maka kulit dauh itu ikam gambari wan muha Tulamak?” ujar Garbus manakuni Palui.

“Aku sarik lawas wan Tulamak karna inya rancak banar mamadahakan aku ini pina paharatnya, pamalar, rakus wan mamadahakan aku pandandam,” ujar Palui sambil manyirit Tulamak.

“Karna aku kada wani malawani, bila bakalahi pasti kalah karna awaknya ganal, maka kubalas mancatuk gambar muhanya di kulit dauh ini,” ujar Palui manunjuk.

“Ooo… jadi karna sarik lawas maka ikam mambalasnya di dauh itu. Itu ngarannya dandam jua Lui ai. Karna bulan ini adalah bulan puasa, bulan nang panuh magfirah, bulan panuh ampunan, maka baiknya ikam basalaman haja, bamaaf-maafan, baampunan,” ujar Garbus manyuruh sambil manyatuakan tangan Palui wan tangan Tulamak.