Bini Palui itu tamasuk wanita karir jua. Katuju umpat baarisan, umpat maurusi posyandu, rancak umpat rapat di RT wan balai desa. Karna rancak umpat kagiatan jadi banyak takawan wan batamuan urang, baik bubuhan urang biasa atawa bubuhan urang sugih nang bapakaian macam-macam mudel. Utumatis karna rancak talihat, marasa urang pina bengkeng maka kacar jua liur handak maumpati, lalu hujung-hujungnya batagihan ka laki.
“Lalu mauuuuuuukkk,” ujar Palui gagarunum saurangan.
“Napa dipander Lui, pina gagarunum saurangan,” ujar Garbus.
“Bibinian itu kada kawa malihat mudel-mudel nang hanyar lalu kacar haja liur handak umpat manuruti,” ujar Palui.
“Sayang bini itu sama wan sayang anak Lui ai. Kasihan kalu kada dikabulakan kahandaknya,” ujar Garbus.
“Sabujurnya handak haja mangabulakan tapi uncuinya nang kadada,” ujar Palui pina sadih.
“Bini handak napa Lui?” ujar Garbus manakuni.
“Biniku itu handak minta tukarakan salop tinggi tumit karna wayah ini ujarnya lagi ngetop,” ujar Palui.
“Sual mudel pakaian, baju, tapih, salendang, sipatu, sandal, salop, jam tangan kada kawa dituruti. Kalu dituruti tarus kada cagar kaduitan karna mudel itu lakas baganti-ganti,” ujar Tulamak nang hanyar datang pina manasihati.
“Bujur haja ujar ikam itu Mak ai makanya bini ikam disimpan dipingit di rumah haja, jadi kada malihat urang bapakaian macam-macam,” ujar Garbus malawanakan Palui.
“Biniku itu tamasuk tamasuk wanita karir Mak ai. Kasihan jua kalu hari-hari tatap haja tapih baju nang itu-itu tarus,” ujar Palui.
“Makanya biniku kusayangi dan kukurung tarus di rumah, kusuruh gawian macam-macam supaya kada manjangkit panyakit batatagih,” ujar Tulamak.
“Ikam itu Mak ai kada mahargai hak bibinian, karna haknya sama jua wan lalakian,” ujar Garbus.
“Bini ikam handak minta tukarakan napa Lui?” ujar Tulamak.
“Biniku handak minta tukarakan salop tumit tinggi,” sahut Palui mangaku tarus tarang.
“Gampang, kabalujuran aku ada baisian sapupu nang mangariditakan sipatu, sandal wan salop-salopan,” ujar Tulamak langsung mambawai palui tulak ka wadah sapupunya itu.
Kada lawas Palui kuting-kuting mambawa bungkusan salop tumit tinggi wan langsung manjulung kabininya supaya dipakai gasan saruan isuknya.
Himung banar Palui bininya basalop tumit tinggi. Bininya itu magin kalihatan langkar. Banyak urang marawa, banyak lalakian nang malilik. Malah kada saikung badua ada jua nang mambawai bakanalan lalu batakun di mana rumah wan numur talipun.
Rupanya malihat bininya itu babungas, Palui gaer jua kalu-kalu bininya itu tahilap-hilap lalu diambil urang. Isuknya diam-diam ditataknya tumit salop bininya itu.
“Tanyata mudel kada salalu cucuk gasan kaharmunisan laki bini,” ujar Palui gagarunum pulang wayah batamuan Garbus wan Tulamak.
