Palui hanyar haja pindah rumah, karna rumah siwaannya sudah habis. Kalu dahulu di pinggir jalan ganal maka wayah ini tapaksa bamasuk ka dalam gang. Alasannya badiam di dalam gang ini labih nyaman karna banyak kapatuhan dibanding di pinggir jalan ganal, jarang kawa bapapanderan wan tatangga, sabab masing-masing haur.

“Pabila ikam mulai pindah rumah di dalam lorong ini Lui?” ujar Garbus.“Hanyar ha Bus ai, kurang labih sabulan,” sahut Palui.

“Pantas haja wayah di muhara tadi kami mandatangi rumah ikam itu sudah didiami urang lain, sakalinya ikam sudah pindah ka sini. Mula-mula kami himung banar karna ikam sudah makin sugih sabab di halaman rumah itu ada mutur kijang,” ujar Tulamak.

“Napa alasan pindah Lui padahal di sana rumahnya ganal dan baik,” ujar Garbus.

“Kami mancari katanangan karna di pinggir jalan ganal itu galu banar. Apalagi siang banyak mutur lalu lalang,” ujar Palui.

“Aku paham haja Lui ai ikam katuju badiam di dalam lorong ini bukan karna alasan mancari katanangan tapi karna siwanya di sini labih murah,” ujar Tulamak wan Garbus wayah mailangi Palui.

“Alasan lain Mak ai, badiam di dalam gang ini banyak kapatuhan, wayah kamarian kawa bapapanderan wan tatangga kiri kanan. Sadangkan wayah badiam di rumah jalan ganal sana sama sakali kada sawat bapapatuhan karna masing-masing haur wan gawian. Kaya itu jua wayah kamarian bulik bagawi, masing-masing langsung batutup pagar wan bakancing lawang,” ujar Palui.

“Itulah risiku hidup di kuta ganal Lui ai, aku-aku, ikam-ikam, ujar urang betawi gue-gue, loe-loe,” ujar Garbus pina saraba tahu.

“Hi’ih bujur jua alasan ikam itu Lui ai, makanya di kuta ini urang katuju bajalanan ka pasar, ka super market atawa bapiknikan, jadi kakawanannya justru banyak di luar,” ujar Tulamak.

“Kami katuju haja ikam badiam di dalam gang ini apalagi gangnya barasih, banyak tanamannya, rumahnya taratur,” ujar Garbus.

“Kami labih himung lagi Lui ai karna hidup ikam sudah makin nyaman, kulihat sudah baisian tivi, masin jahit, kipas angin wan kulkas, nyaman pada rumah di jalan ganal samalam,” ujar Tulamak.

“Aku kada munafik jua Mak ai, aku kawa batutukar barang-barang ini adalah barakat jasa rumah ganal siwaan di jalan ganal itu jua,” ujar Palui lihum.

“Kaya apa caranya Lui?” ujar Tulamak.

“Caranya gampang banar, rumah di jalan ganal itu mulanya kusiwa talu tahun tapi hanya kudiami satahun haja. Nang dua tahunnya kusiwaakan pulang kaurang lain wan siwanya dua talu kali lipat. Alhamdulilah huhujungan itulah nang katukarakan ka barang rumah tangga ini,” ujar Palui mambuka rahasianya jadi tangkulak manyiwakan rumah.

“Dasar ikam utak barangkap Lui ai, banyak akalnya,” ujar Garbus mamuji.