Kisah Palui Mahitung Puasa

Matan habis sambahyang Ashar Garbus pina sibuk banar mambulak-balik almanak nang bagantung di langgar. Palui nang maitihi matan tadi bingung malihat kalakuan kawalnya itu.

Napa Bus nang dihitung? ujar Palui handak tahu.

Kada karasa-an labih satangah bulan kita puasaan, ujar Garbus mamanderi Palui.

Hitung bujur-bujur Bus ai, bujur kada labih satangah bulan? sahut Palui.

Bujur labih satangah bulan Lui ai karna kita mulai puasaan hari tanggal 29 Juni wan hari ini sudah tanggal 23 Juli, ujar Garbus.

Ikam salah hitung Bus ai, aku yakin banar bahwa puasa ikam kada sampai satangah bulan, paling-paling saminggu, ujar Palui.

Kita kada kawa mangaramputakan hitungan hari, Jumat ka Jumat hitungannya 8 hari. Parasaan sudah tiga hari Jumat kita lalui, ditambah sampai hari ini Lui ai, balas Garbus.

Bujur haja hitungan urang puasa labih satangah bulan malah tinggal tiga balas hari haja lagi, tapi puasa ikam kada sampai saminggu, ujar Palui.

Puasaku kaya orang jua hitung hari bulan puasanya, ujar Garbus. Kada usah bakaramput Bus ai, salawas saminggu ini aku babarapa kali malihat ikam masuk ka warung sakadup, ujar Palui.

Wahhhh………. ikam mambuka rahasiaku, sahut Garbus.

Kuta kita ini halus jadi kada kawa bakaramput, tiap masuk ka warung sakadup puluhan mata nang malihatnya, ujar Palui.

Tapi kanapa maka ikam tahu aku rancak masuk ka warung sakadup? balas Garbus.

Biarpun urang kada malihat Bus ai, Tuhan tahu haja. Jadi kita di banua ini kada kawa bakaramput dan kada kawa balindung-lindung, ujar Palui.

Aku hiran banar kanapa maka ikam tahu samunyaan warung-warung yang kumasuki.

Musti ada nang mamadahakan, ujar Garbus.

Sumpah nah, kadada urang nang mamadahakan, ujar Palui.

Kalu kaya itu aku curiga, musti ada mata-mata ikam, ujar Garbus manggasak.

Sudah kupadahakan bahwa kadada urang nang mamadahakan dan kadada jua mata-mataku, ujar Palui.

Aku hiran banar kanapa maka ikam tahu harinya, tahu jamnya wan tahu warung sakadupnya wayah aku masuk kasitu, balas Garbus.

Kada usah hiran dan kada usah bingung Bus ai, Palui tahu samunyaan warung-warung sakadup wadah makan nang ikam masuki, ujar Tulamak nang hanyar datang umpat bapander. Bila kadada bukti wan saksi sama wan fitnah, sahut Garbus.

Kada usah takabur Bus ai, karna satiap ikam tuntung makan lalu kaluar………. maka Paluilah nang masuk mangganti bakas kadudukan ikam itu, sahut Tulamak.

Ada saksinya ujar Palui. Satiap aku masuk mangganti bakas kadudukan ikam itu aku kada saurangan tapi pasti badua wan Tulamak ujar Palui mangalakak tatawa kada hakun kalah karna sama-sama tabuka rahasianya kada pamuasa.