BAISUKAN itu paharatan Palui handak tulak ka pasar inya batamuan wan Garbus nang bajalan bairingan wan bubuhan bibinian urang kampung.
“Ikam datang matan mana Bus, pina bairingan wan bubuhan bibinian,” Palui managur Garbus.
“Aku tadi umpat mandangarakan caramah bubuhan urang kasihatan di balai desa,” ujar Garbus.
“Napa isi caramahnya Bus, kawa juakah digawi napa nang dianjurakan ulih bubuhan kasihatan itu,” ujar Palui.
“Kisah nang dahulu jua yaitu tentang ampat sihat lima sampurna,” ujar Garbus.
“Sabujurnya masih kurang Bus ai, nang bujur adalah ampat sihat lima sampurna dan anamnya kawa manukarnya,” ujar Palui tatawa.
“Kalu kaya itu tamasuk ikam karna kawa manggawi dan kawa manukar. Buktinya awak ikam makin hari makin balamak, artinya hidup ikam makmur,” ujar Garbus mamuji.
“Aku ma-amalakan tiap makan iwaknya harus daging,” ujar Palui singkat.
“Kalu kaya itu pantas haja iwak sihat karna hari-hari makan daging karna daging itu banyak pitaminnya,” ujar Garbus.
“Satumat lagi aku handak ka pasar manukar daging,” ujar Palui.
“Bulihlah aku umpat Lui? Ada jua nang handak kutukar,” ujar Garbus.
“Ayu kita tulakan baimbai,” ujar Palui.
Imbah sampai di pasar lalu bubuhannya batutukar. Garbus manukar timbaku, gula, uyah, sedangkan Palui manukar makanan gasan anaknya, lalu imbah itu inya manukar iwak garih haruan.
“Ayu kita bulikan Bus,” ujar Palui mambawai.
“Ikam balum manukar daging Lui, ayu lakasi
tukar kaina aku mahadangi di warung sana,” ujar Garbus.
“Kita langsung haja bulikan kaina hari hujan,” ujar Palui.
“Maka ikam tadi bapadah handak manukar daging karna satiap hari musti daging, lalu mana dagingnya nang ikam tukar. Kulihat tadi ikam cuma manukar iwak garih haruan?” ujar Garbus.
“Makanya tadi kupadahakan bahwa aku hari-hari makan daging,” ujar Palui.
“Ini nah iwaknya, nang kumakan dagingnya haja sedangkan tulang-tulangnya kubuang kujulung ka kucing,” ujarnya pulang.
“Palui, Palui… ba-agak hari-hari makan daging sakalinya daging iwak karing, kukira tadi daging sapi, daging hadangan atawa daging kambing,” ujar Garbus.
Garbus Inya gagarunum karna Palui masih haja katuju mambunguli kawan. (ivd/mht/rep)
