Kada habar dipahabar, mamarina Palui di pahuluan, julak Badul, diangkut ka rumah sakit karena dikuracak wan diigut warik. Warik inguan sidin jua, sudah lima tahun disuapi disayangi, tapi tiba-tiba manyarang julak Badul.

“Nah, itulah cuntuh gasan kita, bahwa soal suap-manyuap ini banyak mudaratnya. Julak Badul 5 tahun menyuapi warik akhirnya parak mati digasak warik,” ujar Palui.

“Aah…itu warik lain manusia. Binatang kada tahu batarima kasih,” ujar Tuhirang umpat bapandir.

“Amun manusia marasa disuapi, tahutang budi, pasti kahada purun mambalas wan kadurhakaan.”

“Tapi kita lihat jua suap menyuap di masyarakat manusia. Ada bamacam-macam kadar nilainnya,” ujar Palui pina panahunya.

“Pertama suap manyuap pangantin waktu batatai di pelaminan, itu adalah suap cinta kasih. Kedua, suap ibu, menyuapi anaknya, itu suap kasih sayang atau suap lillahi ta’ala,” ujar Palui.

“Ketiga, suap perawat kepada pasiennya, itu suap perikemanusian.

Keempat, suapan rakyat jelata kepada patinggi, itu suapan mengharap sesuatu.”

“Kelima, suapan antara patinggi lawan patinggi, nang salalu diiringi wan bisik-bisikan, wan Senyum-senyuman, sidin-sidin haja nang mangarti. Kita-kita ini urang awam, kahada tahu maksudnya. Wallahu alam bissawab”,ujar Palui nang kaya dusin mambari kuliah.

“Umailah!” ujar Garbus sambil manggawil Tuhirang,

“Katua RT kita takana cerdas hari ini, Abang Palui sekarang lain dari Palui dahulu kan?” ujar Garbus ma-ambung.

Palui takarinyum, langsung manjawab. “Pas tangguhan ikam, aku sudah umpat  satudi banding kaluar daerah. Makanya aku tahu hal suap manyuap ini,” ujar Palui.

“Kaya apa amun urang manulak suapan Lui ? Inya kada mau disuapi,” ujar Tuhirang umpat batakun.

“Aaah, itu pura-pura haja manulak, tapi muntungnya sudah banganga, kacar wan liurnya sudah batitikan ka dagu”, ujar Palui pina musti.

“Baaah… ngini manyindir aku,” ujar Tulamak. “Mentang-mentang aku gancang makan, aku kahada kapingin disuapi.”

“Kanapa kada kapingin?” ujar Garbus lihum.

“Aku gaer kalu aku mati konyol, lantaran si panyuap itu kada ikhlas, lalu dibuatinya racun. Hii…jauhakan bala”, ujar Tulamak.

“Bah iya am bubuhannya ini haur suap makan haja pikiran.” garunum Palui dalam hati.

“Kasimpulannya, kaya ini haja, kaya apa kalu kita sabarataan ini ka warung. Di situ banyak disadiakan hidangan nang kawa disuap. Aku katua RT nang bayar, kaya apa?” ujar Palui

“Akurrr…”, sahut buhan lainnya sambil manaiki masing-masing sapida pancalnya, sapida “cap Onta”.