Sudah jadi kabiasaan tiap tahun, tiap musim katam bubuhan Banjar maambil upah mangatam ka Gambut. Gambut itu biarpun parak wan Banjar tapi sudah kadada lagi nang hakun jadi tukang katam ujar Palui.

“Makanya aku tapikir kalu wayahini haja kadada lagi nang handaknya jadi patani atawa tukang katam, maka bisa dibayangakan lima anam tahun nang akan datang cagar mubazir banih masak di pahumaan,” ujar Garbus.

“Jangan hawatir Bus ai, karna itu artinya cagar jadi razaki gasan bubuhan kita di pahuluan kaya kaluarga ikam nang disaru ka Gambut gasan mangatam,” ujar Palui.

“Tuhan maha adil, ada nang sugih banyak baisi pahumaan, dan ada jua nang miskin jadi tukang katam makanya saling mamarluakan,” ujar Tulamak.

“Ikam Lui pabila jua datang matan Gambut karna babulan-bulan kada kalihatan di banua,” ujar Garbus batakun.

“Kalu aku tamasuk tanaga sarba guna, gawian napa haja kugawi asal cucuk bacaannya,” sahut Palui.

“Jadi ikam umpat mangatam jualah?” ujar Garbus. “Pantas haja samalam kulihat banyak banar batrak-trak mambawa banih upah mangatam,” ujarnya.

“Rupanya larang banarlah upah mangatam wayahini karna tahun lalu upahnya satu banding anam, artinya bila dapat anam balik banih maka sabalik gasan nang ma-ambil upah,” ujar Tulamak karna inya lawas badiam sampai tapabini di Guntung Papuyu.

“Jadi kalau Palui sampai batrak-trak dapat upahan banih bisa parbandingannya dua atau tiga babanding anam,” ujar Garbus.

“Bubuhan ikam jangan salah paham karna nang kubawa bapuluh-puluh karung dalam mutur trak itu lain banih isinya tapi ……. isinya adalah gabuk ulin sahut Palui.

“Wah, kanapa maka mangatam banih dapat gabuk?” ujar Garbus.

“Kisahnya kaya ininah……. wayah aku ka Gambut sakalinya banih nang dikatam sudah habis karna banyak nang rusak wan ada jua nang balum masak. Jadi daripada kadada gawian supan bulik ka banua maka aku ma-ambil upah mangatam jua, kada mangatam banih tapi maambil upah mangatam kayu ulin,” ujar Palui.

“Jadi bagawi mangatam ulin, upahnya gabuklah?” ujar Tulamak.

“Upahnya duit jua dihitung upah harian, burungan atawa dihitung kubik,” ujar Palui. “Tapi aku singhaja mambawa gabuk ulin itu gasan manimbok halaman,” ujar Palui.

“Macam-macam haja akal Palui, kalah di asam manang di acan,” ujar bubuhannya.