Bujur haja Palui, Garbus wan Tulamak itu sudah kaya dangsanak, karna bubuhannya itu bakawan sudah matan halus. Tapi wayah tempo bubuhannya itu bisa jua sarik wan dandam.
“Bujurkah Lui, ujar Tulamak ikam mancari sapidamutur bakas gasan maujek Lui?” ujar Garbus manakuni Palui.
“Hi-ih aku bacarian sapidamutur bakas haja nang haraganya sakitar dua jutaan haja,” ujar Palui pina sarius.
“Hi-ih ada ai. Haraganya dalapan ratus, sapidamutur merek sogon bakas pakaian guru…” ujar Garbus bamandak.
“Murahnya ai, bujurkah sapidamutur kaluaran hanyar wan pakaian guru. Amun bakas pakaian guru baarti tarawat banar karna guru basapidamutur pasti bagamat wan hati-hati.” ujar Palui kahimungan.
“Hi-ih, kabalujuran sidin parlu duit banar, jadi sidin handak bajual lakas,” ujar Tulamak manambahi.
“Kalu kaya itu bubuhan ikam tulakan kasana, ininah duitnya dalapan ratus amun kawa ditawar kaina labihan duitnya ambil haja anggap kumisi. Aku mahadangi di rumah,” ujar Palui manjulung duitnya.
“Bujuran ditukari kah Lui?” ujar bubuhannya mayakinakan.
“Hi-ih, lajui sana tulak kaina tadahulu urang,” ujar Palui.
Kada lawas bubuhanya badua datang babuncengan mamakai sapidamutur nang hanyar ditukari tadi.
“Ini nah Lui sapidamutur nang kami kisahakan, haraganya kawa kami tawar jadi tujuh ratus, jadi labihan duitnya saratus gasan kami,” ujar Garbus sambil manjulung kunci wan surat-suratnya.
“Hau…hau… kanapa pina buruk, awaknya balalimpakan, satangnya pingkur, wan kanalpotnya bakukus,” ujar Palui takajut. “Kada tasalah kah bubuhan ikam, kanapa maka pina hancur banar bunyinya guru napa nang mamakainya,” ujar Palui hiran.
“Kada, bujur haja tadi aku bapadah bahwa sapidamutur ini bakas ampun guru. Tapi kada sawat aku malanjutakan guru napa sudah ikam putung pandiran aku,” ujar Garbus baulah alasan.
“Sabujurnya guru napa garang?” ujar Palui sarik.
“Ampun maap Lui lah, sabujurnya sapidamutur ini lain bakas ampun guru sakulahan atawa tuan guru atawa guru mangaji. Tapi gurunya guru… guru balap atawa urang nang katuju mangabut di jalanan,” ujar Garbus marasa manang.
“Aku paham bubuhan ikam rupanya mambalas manggawi aku,” ujar Palui kakalahan.
