Wayah hini, kampung Palui kada katinggalan lawan kampung lain. Paling kada, banyak nang sudah mulai tahu wan ngarannya internet.

Gara-garanya, Haji Zubai, urang paling sugih di kampung. Inya manyadiaakan internet Sagan urang kampung supaya kada katinggalan kisah-kisah di luar kampung.

Untungnya, Haji Zubai urangnya jua baikan. Makanya, internet digaratisakannya.

Supaya kada barabut wan bahirian, diaturnya, paling lawas sajam saikung urang. Mandangar raminya urang bainternet, Palui wan kakawalannya nang kaya, Garbus, Tuhalus wan Tuganal tulakan ka rumah Haji Zubai handak marasai.

Pas sampai di situ, sakalinya banyak banar sudah nang datang. Padahal, bubuhannya datang sungsung. Tapi tatap ai tadahulu urang.

Bubuhan Palui dapat numur 16, Lantaran handak banar marasai raminya main internet, satangah harian dihadang bubuhannya.

“Numur 16, giliran main,” ujar Asad, pambantu Haji Zubai mangiaw.

Pamulaannya, kira-kira saparapat jam, bubuhan Palui dilajari urang sesuruhan Haji Zubai mamainakan internet.

Imbah itu ditinggalakan supaya bisa mamainakan saurangan.

Satangah jam, bubuhannya kalikikan di kutak internet. Imbahnya, hinip sampai habis sajam.

“Buhan Palui, bubuhan ikam habis sudah waktunya, bagantian pulang,” jar Haji Zubai manjinguk wadah Palui wan kakawalan main internet.

Tiga kali Haji Zubai mamadahakan waktunya habis, masih haja bubuhan Palui kada sing kaluaran. “Lui, Bus, Nal, Lus, ayu sudah bagantian, kasian nang lain mahadangi,” ujar Haji Zubai.

Masih haja bubuhannya kada manyahut wan kada sing kaluaran pada kutak internet. “Bah kaasikan saku, sampai kada mandangar aku bakiyau,” ujar Haji Zubai wan Asad mandatangi bubuhan Palui.

“Bah ini salah, bujur-bujur salah,” ujar Haji Zubai sambil bauling kapala malihat situs nang dibuka bubuhan Palui.

“Ini ngarannya kada salah, tapi Sarah wan Rahma Azhari,” ujar Palui manyahuti, tapi mata tatap ka komputer.

“Han seksi banar kalo bubuhannya ni?” ujar Palui sambil bapaling. Palui takajut banar karna rupanya nang bapandir tadi Haji Zubai.

“Mulai hari ini, bubuhan ikam kada bulih lagi main internet di sini,” ujar Haji Zubai sarik.

Pas disuruh bulik, bubuhannya tatap kada handak badiri.

“Ampun Pa Haji lah, ulun kada kawa badiri imbah malihat Sarah tadi,” ujar Palui maminta ampun.

“Makanya, internet tu hagin mancari ilmu nang bamanfaat, kada hagin malihati gambar nang kada kakaruan kaya itu pang,” ujar Haji Zubai manasihati.