WAYAHINI makin ngalih haja panghidupan, apa lagi gasan nang hanyar-hanyar lulus sakulah. Maka lapangan gawian kada tapi ada, salain itu saingan sasama pancari gawian magin tambah babanyak.

“Ikam ngalih mancari gawian itu karna awak ikam kalamakan,” ujar Garbus.

“Napa hubungannya antara awak wan gawian Bus?” sahut Tulamak.

“Urang lamak itu bajalan atawa bagawinya lambat tapi makannya banyak, jadi urang kada wani mambayar gajinya sadikit haja,” ujar Garbus.

“Aku Bus ai sudah balatih mangurusi awak. Walaupun wayah ini masih kalihatan lamak tapi aku sudah tangkas, kawa gerak cepat,” ujar Talamak sambil bagaya kaya urang main kuntau.

“Napa dipanderakan pina mahual awak lamak,” ujar Palui nang hanya datang.

“Kami mamander sual gawian. Aku dipadahakan Garbus nang tamasuk ngalih mancari gawian karna awakku lamak. Padahal justru lamak maka kuat ma-angkat barang,” ujar Tulamak lihum sambil mangakui bahwa awak lamak itu parlu makan banyak.

“Baiknya kita bawiraswasta bausaha saurangan haja Mak ai. Aku ada dapat pinjaman mudal matan kuperasi,” ujar Palui.

“Aku, akur, tapi bausaha napa?” ujar Tulamak.

“Kita mambuka warung makanan haja kaya baras, gula uyah macam-macamlah,” ujar Palui.

“Napa syaratnya Lui?” ujar Garbus.

“Syaratnya sutil banar asal tabulik mudal,” ujar Palui.

“Aku umpat mainjam duit kuperasi,” ujar Tulamak.

Imbah mandapat injaman, lalu masing-masing bausaha mambuka kios. Garbus bajualan baju salawar, Tulamak mambuka warung makanan, Palui bawarung rempah-rempah dapur asam acan. Jualannya payu banar. Imbah parak satangah tahun nasibnya kada sama.

“Kanapa maka warung ikam pina makin sunyi Mak? Apakah ikam rugi bujalan?” ujar Palui manakuni Tulamak.

“Syukur aku kada rugi karna sudah bulik mudal sasuai anjuran ikam samalam. Badagang itu harus kawa mambulikakan mudal,” ujar Tulamak pina musti.

“Tapi kanapa maka jualan ikam makin badikit wan makin bakurang nang manukar?” ujar Palui.

“Daganganku makin badikit karna mudalnya sudah kubulikakan ka kuperasi,” sahut Tulamak.

“Mana huhujungannya?” ujar Palui.

“Huhujungannya sudah habis tamakan,” ujar Tulamak.

“Dasar Tulamak jago makan, huhujungannya habis tamakan. Harusnya ikam sisihakan sapalih gasan dimudalakan pulang mangambangakan jualan ikam ini,” ujar Palui maniwas Tulamak karna kada paham arti bajualan dari duit kreditan.

“Nang panting aku kadada tahutang wan mudalnya sudah tabulik ka kuperasi,” ujar Tulamak taungut karna isuknya kada kawa lagi mambuka warung. (rep/tam)