Samingguan Palui kada parnah cangul bakakawanan, maulah bubuhan kakawalannya dandaman banar. Apalagi ada tadangar habar garing, maka Garbus wan Tulamak bajanjian mailangi.
“Aku datang mailangi ikam ini Lui ai karna mandangar habar kalu ikam garing,” ujar Garbus.
“Siapa nang mahabarakan Bus?” ujar Palui.
“Ada kakanakan mamadahakan bahwa ikam Lui ai saban hari bakalubut wan tapih, lalu dipadahakannya garing,” ujar Garbus.
“Aku kada garing Bus ai, sihat-sihat haja,” sahut Palui.
“Bujurlah ikam ada bakalubut wan tapih?” ujar Garbus.
“Aku kada biasa bakalubut wan tapih, tapi kalu tapih basandang di bahu itu sudah kabiasaanku,” ujar Palui.
“Ooo … mungkin nang dilihatnya bakalubut wan tapih itu adalah kamanakanku nang hanyar basunat. Abah umanya badiam di Samarinda wan wayah parai sakulah tadi inya umpat basunat di sini,” ujar Palui hanyar ingat ada urang bakalubut di rumahnya.
“Nah itu si Tulamak ka sini jua pasti inya handak mailangi ikam,” ujar Garbus manunjuk Tulamak.
“Ini urangnya mancungkung, sigar bugar kanapa maka dihabarakan garing,” ujar Tulamak umpat manumpalak.
“Kalu handak bailang, bapadah bujur-bujur wal ai. Ayu lakasi masukan ka rumah,” ujar Palui manyilahakan masuk.
“Kami sabujurnya dandaman bilang saminggu haja kada batamuan wan ikam Lui ai,” ujar Tulamak.
“Tadi sudah kusambat wan Garbus bahwa samingguan ini aku kadatangan mamarina matan Samarinda,” ujar Palui.
“Sabalum ikam manyambat ada tamu matan Samarinda, aku sudah tahu Lui ai,” ujar Tulamak.
“Napa buktinya Mak?” ujar Garbus.
“Buktinya, itu dalam galas plastik ada wadai gabin kandal matan sana,” ujar Tulamak manunjuk.
“Tangguhan ikam pas banar Mak ai. Ayu, ayu … silahkan dirasani, silahkan dimakani,” ujar Palui manyuruh sambil mangiyau bininya minta ulahakan banyu teh.
“Cucuk wan liur, rasanya manis-manis lamak,” ujar Garbus.
“Maaf Lui-lah, karna kanyamanan biasanya mamakan gabin nyaman kaya ini aku habis sampai ampat lima buting,” ujar Tulamak sambil maambil pulang.
“Silakan haja tambah mamakannya, samalam mamarinaku itu mambawa sabalikan, masih ada parsadiaan,” ujar Palui manyuruh.
“Uiii abahnya, hadangilah banyunya balum manggurak, satumat lagi …,” ujar bini Palui matan dapur. Kada lawas imbah baucap itu, bini Palui kaluar mambawa banyu tehnya, langsung manyurung.
“Pas banar, ampat lima buting gabin hanyar nginum,” ujar Garbus langsung manuntum tehnya.
“Hiih, aku kaya itu parak kasadakan, imbah nginum langsung mahalunyur gabinnya ka dalam parut,” ujar Tulamak sambil tangannya masih manjumput gabin itu lalu kiap-kiap mamakannya.
Kada lawas kadangaran babarapa kali inya mariga, sambil manapuk parut kakanyangan karna parutnya hibak.
“Tambah lagi Mak, tambah lagi Bus,” ujar Palui manyuruh.
“Parutku kada tahan lagi Lui ai, parutku buntau handak muak, kalurukan babunyi,” ujar Tulamak wan Garbus taimbai bapadah parmisi bulik karna handak bahira, maklum gabin kandalnya makin malarak dalam parut karna dinginumi banyu panas.
“Hahahaaa …,” ujar Palui mananawakan kawalnya nang rakus mahantup wadai gabin kandal itu.
