Kisah Palui dan Bingka Manohara

Pina galurukan parut Palui amun sudah tangah hari, kada karuan rasa tupang inya. Handak guring kada mau, manuntun tipi pina sakit kapala. Muyak jua akhirnya inya tulak ka pangkalan paojekan manamui kakawalannya.

“Hau, kabiasaan ikam parak kamarian hanyar cungul Lui, kanapa pina basiang hari ni kasini?” ujar Tulamak managur.

“Aku kada kawa guring Mak ai, kabiasaan imbah bajuhur aku guring satumat, tuntung asar turun baasa,” sahut Palui.

“Puasa tu jangan jua banyak guring, bisa makruh,” ujar Garbus umpat manyala.

“Baik guring pada mamander urang,” ujar Palui kada hakun kalah.

“Baik mamander urang pada malilik bingka Manohara mangaramputi bini,” ujar Garbus mambalas.

“Kadada ai nang baiknya bubuhannya ai. Mun handak baik tu baitiqap ka masigit sana, mambaca Al Quran atawa Juz Amma sambil malancari surah-surah handap, kalu-kalu disuruh jadi imam tarawih, ujar tuan guru nang kabalujuran liwat.

“Ikam kanapa Bus pina pucat?” ujar tuan guru manakuni Garbus.

“Garbus tu dasar kaya itu guru ai, puasa tu dianggapnya beban, lucut banar,” ujar Palui mahapak.

“Ulun ni dasar kada panahanan guru ai, tapi tatapai ulun puasa biar lamah kaya ini,” ujar Garbus.

“Itu ngarannya harat Bus ai manahani godaan, lawan uyuh sagala macam, pahalanya ganal,” ujar guru.

“Aku ada akal supaya kawa babuka badahulu, tapi kada mambatalakan puasa,” ujar Palui.

“Kaya apa caranya Lui? ujar Tulamak manyahut.

“Amun bubuhan ikam handak, wayahini jua tulak ka Binuang sana. Di Binuang wayahini sudah babuka,” ujar Palui.

“Kada mungkin, karamput ikam. Dua jam lagi hanyar babuka, di binuang paling babeda samanit,” ujar Garbus kada parcaya.

“Bubuhan ikam di halabionya Palui,” ujar guru tatawa imbah tahu akal Palui.

“Kanapa pian tatawa guru?” ujar Tulamak wan Garbus taimbai.

“Babuka tinggal dua jam lagi, amun tulak ka Binuang di jalan sudah 2 jam, bujur ai sampai di binuang bubuhan ikam sudah babuka,” ujar guru mamacah panderan Palui.

“Kita pulang handak diwaluhi Palui,” ujar Garbus tambah sakit parut manahan lapar.“

Ayu nah antar aku ka pasar wadai, aku handak jua marasai bingka manohara,” ujar tuan guru manggayai Palui.

“Amun kaya itu lawan ulun ja guru ai, pas banar lawan kahandak,” ujar Palui kahimungan.