Kisah Palui Barelaan

Wayah malam hari raya tadi Palui wan kakawalannya umpat jua manjadi amil zakat di masigit. Sakalian mahadangi urang maantar fitrah bubuhannya salajur jua batakbiran. Ada pang sampai pukul dua balas hanyar tuntung bulikan ka rumah.

“Ujar tuan guru bahwa urang nang kada ganap puasanya alias balang kambingan atawa nang puasa ramadan sanin kamis mustinya kada usah umpat batakbiran,” ujar Garbus manyindir Tulamak wayah bulik matam masigit.

“Kalu kada umpat batakbiran maka makin katahuan banar kada pamuasa, jadi sakakalinya kada pamuasa, jarang tarawih lalu kada umpatan marayaakan hari fitrah, maka bisa dipadahakan urang islam KTP haja,” ujar Tulamak pina manyasal.

“Nah Mak, sasal dahulu pandapatan sasal kamudian kadada gunanya,” ujar Garbus.

“Ayu ja aku bajanji, tahun kaina aku bahimat baibadat mambayar karugianku tahun ini,” ujar Tulamak.

“Mudahan ikam panjang umur,” ujar Palui manyahutakan janji Tulamak dihadapan Garbus.

“Cuba cuntuh si Palui urang nang taat baibadat kada katinggalan waktu ujar Garbus maambung Palui.

“Palui ini tamasuk urang kumplit,” ujar Tulamak.

“Alhamdulillah imbah puasa ini aku bujur-bujur asa lapang dada, kada lagi nang dipikirakan. Puasa kawa sabulanan, tarawih kada katinggalan, zakat fitrah tapunahi, lalu sudah basalaman, sudah barelaan, sudah bamamafan lahir batin wan kakawalan, wan pakacil Isul wan kuperasi. Samunyaan sudah ikhlas kadada lagi sangkut paut hutang mahutang,” ujar Palui lihum.

“Kanapa Lui, kadada lagi sangkut paut hutang-piutang?” ujar Garbus batakun.

“Bujur Bus ai, aku sudah minta maaf barelaan wan pakacil Isul nang bawarung, wan julak Ambrun nang mangariditakan sapida, wan gulu Janang nang mahutangi baju salawar, bubuhan sidin-sidin samunyaan sudah ihklas mamaafakan aku wan rela bila ada nang bakalangan di hati,” ujar Palui.

“Ikam salah tafsir Lui ai, maaf bamaafan itu ihlas haja bila ada salah hilaf tapi sual hutang kada kawa dimaafakan karna itu urusan dunia,” ujar Tulamak.

“Bujur bubuhan sidin kutakuni dan hakun mamafaakan aku lahir bathin, dunia akhirat,” ujar Palui mangarasi.

“Ayu ja tapintar ikam bapander Lui ai, mudahan bubuhan sidin bujur-bujur ikhlas,” ujar Garbus kada kawa malawani Palui nang pambabal.

“Mudahan ai sidin-sidin itu kada purun lagi managih karna samunyaan sudah barelaan lahir batin, dunia akhirat tamasuk hutang-hutangku nang jumlahnya ratusan ribu,” ujar Palui pina kahimungan banar.