Banyaki WC-nya

Palui wan kakawalannya mulai matan lagi halus sampai baranakan balum biasa ka Banjar. Paling-paling hanya mandangar kisah di Banjarmasin ada macam-macam. gadung-gadung batingkat, ada jua tuku2 ganal banar wan bioskopnya. Makanya imbah baakuran maka bubuhannya batuturuk duit gasan tulakan ka Banjar manumpang taksi colt. Di dalam taksi bubuhannya bapapanderan dan batakun wan supir.

“Pir, di mana kita bamandak makan nginum,” ujar Palui.

“Kita baistirahat di warung Pulau Pinang haja karna di sana nyaman banar wcnya.

“Nah Lui, kita kaina makanan di warung itu haja karna wc-nya nyaman,” ujar Tulamak.

Sampai di Pulau Pinang lalu bubuhannya turunan matan mutur dan langsung mamasan makanan.

“Ikam mamasan napa Bus?” ujar Tulamak.

“Aku makanan banua haja, iwak bapais wan papuyu baubar dan gangan kaladi,” ujar Garbus lalu mangiyau panjaga warung.

“Aku sama wan Garbus tapi tambahi dan banyaki wcnya, karna ujar supir tadi di sini wc-nya nyaman banar,” ujar Palui.

“Kalu kaya itu aku umpat jua mamasan wc-nya,” ujar Tulamak.

Panjaga warung bingung mandangarakan pasanan bubuhannya batiga itu, karena marasa balum yakin maka panjaga warung itu batakun pulang.

“Jadi pasanan sampiyan-sampiyan ini iwak bapais, gangan kaladi wan papuyu baubar, lalu … ditambahi napa?” ujar panjaga warung.

“Buati dan banyaki wcnya, karna ujar supir tadi makanan wc di sini nyaman banar,” ujar Palui. Wayah bapanderan wan panjaga warung itu, si supir umpat mandangarakan panderannya.

“Bubuhan sidin nang batiga mamasan makanan supaya ditambahi wc-nya,” ujar panjaga manjawabakan.

“Huahaha … hahaaa…,” ujar supir mangalak tatawa lalu baucap: Sampiyan-sampiyan ini talalu-lalu banar kanapa maka mamasan makanan ditambahi wc,” ujar supir.

“Tadi di mutur supir baucap bahwa di sini wc-nya nyaman banar,” ujar Palui manjawab.

“WC itu kakus jualak ai, nyaman wc-nya karna kamarnya banyak, barasih wan banyunya jaranih,” ujar supir.

“Ayu ja kami pasan nang ada haja, aku handak banar bakamih parmisi satumat ka wc,” ujar Palui maalihakan pander karna marasa kakalahan katahuan kabubungulannya.