Kisah Palui Balajar Batukang

Mamarina Palui baniat mambaiki hatap, mangganti tawing wan lantai. Karna kada cukup duit gasan maupahakan, tapaksa digawi saurang.

“Ikam Lui ai kuminta mambantu aku manukangi rumahku ini, sambil balajar manukang. Kalu kaina tuha kadada gawian atau ngalih mancari gawian maka kabisaan manukang ini bisa dijadiakan mudal,” ujar mamarinanya mamanderi Palui.

“Inggih, ulun siap haja julak ai,” ujar Palui manyahut.

“Gawian manukang ini sabujurnya kada ngalih Lui ai. Apalagi rumah kayu, hanya talu macam haja yaitu manggargaji, manatak dan mamaku,” ujar mamarinanya.

“Ooo… jadi tiga macam hajalah Lak. Padahal ulun lihat macam-macam nang digawi, kada cuma tiga macam itu haja,” ujar Paluikada parcaya.

“Wayah ini samunyaan barang sudah tasadia di pasar, tinggal manukar haja. Ada paku, ada papan, ada kasau, ada ring, ada hatap, ada engsel,” ujar mamarinanya.

“Nah, banyak banar macamnya Julak ai,” ujar Palui.

“Cuma talu macam haja. Papan atawa kasau dan riing bila kapanjangan lalu ditatak, bila balum licin atawa kada rata maka parlu dikatam digargaji dan bila sudah cucuk ukurannya tinggal mamasang lalu dipaku,” ujar Julaknya.

“Hi ih-lah nyaman banar manggawinya kalu cuma talu macam itu haja, tapi… tapi kanapa maka sampai babulan-bulan hanyar tuntung Lak?” ujar Palui.

“Nang lawas itu Lui ai adalah wayah maukur, maniring, mampasakan, maangkat, mamasang, manyusun dan harus turun naik tangga. Lalu baistirahat satumat karna kauyuhan di samping gasan makan dan nginum,” ujar Julaknya.

“Balum cukup Julak ai, karna masih harus sembahyang zuhur dan sembahyang asyar,” ujar Palui manambahi.

“Jadi kalu cuma dua bulan atawa sampai ampat, lima bulan hanyar tuntung biasa haja Lui ai, karna ada nang labih lawas lagi sampai batahun-tahun bahkan sampai puluhan tahun hanyar tuntung,” ujar Julaknya.

“Kalu cuma satahun hanyar mungkin haja Lak ai, tapi kada mungkin kalu sampai puluhan tahun” ujar Palui mangaramputakan panderan Julaknya.

“Buktinya rumah Julak ini parak puluhan tahun hanyar tuntung,” ujar Julaknya.

“Napanya nang maulah lawas itu Lak?” ujar Palui kada paham.

“Nang maulah lawas sampai puluhan tahun itu adalah mangumpulakan duitnya gasan manukar bahan-bahannya,” ujar mamarinanya lihum.

“Tapintar nang tuha jua karna tabanyak mamakan uyah,” ujar Palui baucap dalam hati karna dikalahakan Julaknya.