Kisah Palui Andak di Balukuk
Saharian muha Garbus pina masam, kadada kurihingnya sama sakali. Sudah muha babaya sangkut, ditambah pulang masam, magin tambah kurisaan. Malihat kaya itu buhan Palui pina kada tapi wani managur, bisa tasalah kaina.
“Napa bubuhan ikam pina lelek-lelek?” ujar Garbus managur kakawalannya.
“Ikam nang kanapa bus, bakalahi lawan bini lagi kah?” ujar Palui Bawani batakun.
“kada Lui ai…barakat nasehat ikam, duitku habis manukar piring palastik salusin,” ujar Garbus.
“Urusan itu haja bamasam-masam muha, kaena aku injami duit, nang panting ingat bayarnya,” ujar Palui.
“Bujurkah Lui? Cuba itihi ban sapida muturku nang muka gundul banar, makanya aku bingung limbah habis duit nukar piring palastik, sakalinya ban sapida mutur minta baganti jua,” ujar Garbus.
“Aku ada usul Bus ai supaya ban muka ikam kada capat lisit atawa gundul,” ujar Palui sambil manjulung duit ratusan ribu.
“Kaya apa caranya Lui? ujar garbus handak tahu.
“Ban muka nang hanyar ikam tukar kaena andak ka balakang, aku jamin kada pacangan lisit atawa gundul lagi,” ujar Palui mambari sarannya.
Limbah manukar ban muka lalu diandaknya ka balakang sasuai wan saran Palui. Tulamak umpat jua mangganii mamasang.
“Manurut aku Bus ai, ngaran ban mun dipakai tarus tatap haja kaena lisit,” ujar Tulamak gagarunum.
“Kita cubai haja dahulu saran Palui Mak ai, kalu pina bujur,” ujar Garbus.
Kada sampai sabulan, sakalinya ban nang hanyar ditukar Garbus nang di andaknya dibalakang kalihatan pina lisit pulang.
“Ikam ni pangaramput Lui ai, lihati nah ban nang hanyar kutukar samalam, limbah kuandak ka balakang tatap haja lisit,” ujar Garbus manumpalak Palui.
“Ooooo…. Ikam salah mangartiakan saranku itu,” ujar Palui.“Aku mandangar jua Lui ai saran ikam, ban muka diandak di balakang, iya kalu?” ujar Tulamak malawanakan Garbus.
“Bujur… bujur banar Mak ai, tapi ikam tasalah maandaknya. Maksudku kadanya diandak dibalakang sapida mutur pang,” ujar Palui lihum.
“Lalu diandak di mana?” ujar Garbus kada paham.
“Maksudku andak di balakang awak ikam atawa di balukuk ikam, disahan batarusan. Aku jamin ban hanyar ikam kada pacang lisit pulang,” ujar Palui langsung mangalunyur takutan kalu disuntul Garbus.
